Mga palusot ni VP Sara
Palihug subaya ning lista sa mga detalye unsa kasimang ang ikaduhang labing taas nga opisyal sa nasud:
• Gipangutana siyang Senador Risa Hontiveros unsay sulod sa iyang libro nga pagastohan og P10 milyones;
• Nasuko si Bise Presidente Sara Duterte, namuyboy ni Hontiveros ug nipasangil nga gi-pamolitika ang budget;
• Gituki sa House Appropriations Committee ang mas dakong budget sa Office of the Vice President sa 2025;
* * *
• Gipasanginlan niyang komitiba nga nihanig sa iyang impeachment, nidemanda nga pailisan ang presiding officer ug nagdumili pagtubag sa mga pangutana;
• Giimbestigar sa House Blue Ribbon Committee giunsa paggasto ang iyang budget sa 2023;
• Gipasanginlan niyang komitiba nga nihanig sa iyang impeachment, gipasanginlan nga walay sukaranan ang imbestigasyon, nagdumili pag-take og oath ug nibiya sa walay pagtubag og bisan unsang pangutana;
• Giimbitar sa komitiba ang mga opisyal sa OVP ug Department of Education (DepEd) pagrepresentar niya;
* * *
• Wala motunga ang taga OVP pero nitambong ang taga DepEd, usa nila niangkon nga gihatagan ni Duterte og sobre nga dunay P50,000 sulod sa siyam ka buwan pero dihang nibalibad siyang lakturon ang subasta sa computerization program giawhag sa pag-resign;
• Samtang padayong nangisnab ang OVP, dugang tulo ka opisyal sa DepEd niangkon nga nakadawat gikan ni Duterte og mga sobreng gisudlan og kuwarta ug nabisto ang P16 milyones nga gibayad og safehouse sulod lang sa 11 ka adlaw sa 2022, P15 milyones para sa informants uban ang certifications sa kalihokan nga wala diay silay gasto bisan usa ka dako, ug acknowledgment receipts nga sayop ang mga petsa, giwiris-wirisan og pirma ug usa sa naklaro nga ngalan iya ni “Mary Grace Piattos”;
* * *
• Dihang gihulgang ipadakop ang nangisnab nga mga opisyal sa OVP, nitambong ang mga nag-okupar og plantilla positions pero walay kasayuran giunsa paggasto ang confidential funds ug ang mga nasuhito, nga iyang mga sinaligan sa mayor pa sa Davao City, nipasangil nga busy sa anibersaryo sa OVP;
• Niatubang sa komitiba ang nagpailang abogada nga walay authorization pagrepresentar sa OVP ug, sama ni Duterte, nagdumili pag-take og oath, maong gipalayas sa House; ug
• Nag-press conference si Duterte sa Bacolod usa ka adlaw human sa public hearing aron lang pagbalik sa pasangil sa iyang impeachment.
* * *
- Latest
