Pagkaamgo sa kainutil
Kapin sa duha ka tuig human nikanaog sa Malakanyang ug bisan 79 anyos na (ambot nganong nangangkon sa iyang press conferences sa Davao City ug sa iyang testimoniya sa Senado nga 73 pa), napamatud-an ni kanhi Presidente Rodrigo Duterte nga wala pa siya malawos.
Abunda gihapon ang balikas, maayo gihapong mosal-ot og bugal-bugal, mapagarbuhon gihapon sa pagtuo nga pinatyanay ang sulbad sa drugas (bisan nisamot ang problema human sa 35,000 ka extrajudicial killings) ug isog gihapong nanghagit sa mga nisukwahi niya. Pero siyay labing nasuhito nga hingpit nang naiuntil.
* * *
Gibinastosan ug gitawag ni Duterte og mga ngalan ang mga sakop sa House Quad Committee. Gihudlat nga patiran ang mga kongresista nga nipasangil niyang nitalaw sa ilang imbestigasyon.
Pero nahibawo nga kutob na lang siya sa sulti. Wala nay mahimo batok nila. Nabalhog niya sa prisohan si kanhi Senador Leila de Lima human gikulata og bakak nga mga pasangil kay presidente pa man siya niadtong 2017. Pero dili nang katandog ni Kongresista Stephen Paduano, nga gawas nga pangulo sa Public Accounts Committee kanhi kumander sab sa Alex Boncayao Brigade.
* * *
Nanghambog gihapon nga nagtukod og death squad nga mga kanhi hepe sa kapolisan ang nagdumala, nipasigarbo gihapon nga daghan nang napatay pero hangtod karon wala pay nangahas sa pagkiha niya, ug nipasiatab gihapon nga ang gidudahang mga durugista gidasig nila pagsukol maong laktod nga napatay.
Patuyang og pangangkon sa mga patay kay dunay immnunity from suit dihang presidente sa 2016 hangtod 2022. Pero gisagolan na og likoy sa Senado kay under oath ug dili nang kalusot nga nagpaukyab lang.
* * *
Nakapatuyang ang lapad nga binayranay ug laktod nga pinatyanay sa drug war ni Duterte tungod sa abiba sa mga senador ug mga kongresista ug katawhan. Ambot bilib ba gyod niya. O nag-apas sa pork barrel ang mga politiko ug nahadlok nga sunod nga maihaw ang publiko.
Pero si Duterte nahibawo nga ang pagbalikbalik sa iyang labing maayong mga linya sa 2016 dili na epektibo sa 2024. Abunda ang mga ebidensiya nga wala nay nibilib ug nahadlok niya: Nagmingaw ang iyang Maisug rallies ug walay sundawo ug polis nga interesadong mo-kudeta ni Presidente Ferdinand Marcos Jr.
* * *
- Latest
