EDITORYAL — Pag-usik usik lang sa pundo?

Ang pagpahigayon og Pasigarbo sa Sugbu ug Suroy-Suroy sa Sugbu usa ka pag-usik-usik sa pundo sa katawhan, sumala pa sa usa ka kandidato sa pagka-gobernador sa lalawigan.

Pagkatinuod, duna nay Sinulog sa Cebu City, kaning Pasigarbo nga may pagka-parehas niini og tema, mura na og kakompetinsya sa sikat nga festival sa mga Sugbuanon nga pahinungod sa Balaang Batang si Senyor Sto. Niño.

Apan ang tumong sa Suroy-Suroy mao ang pagpakita sa mga nagkadaiyang mga tourism destinations sa usa ka lugar sama sa mga lungsod ug component cities, lakip sa gipakita ngadto sa mga bisita ang mga lokal nilang produkto.

Para sa maong kandidato, mas maayo pang gamiton ang pundong gigahin sa mga ingon niini nga kalihokan sa mga gikinahanglan sa katawhan.

Duna siya punto sa iyang rason. Pwede gyud nga adto ibubo ang kwarta sa mga imprastraktura, basic services, agrikultura, health, education ug daghan pang uban.

Duna tingali pipila nga kinahanglan pa gyud palambuon apan wala magpasabot nga wala atimana kay mas giuna ang maong gisaway sa mga kalihokan.

Apan kani sila aduna namay gitaganang mga pundo ug nakahan-ay na kada tuig, kaning para sa pagpalambo sa turismo aduna say buwag nga pundo ug kining Pasigarbo ug Suroy-Suroy usa sa mga programa niini.

Samtang tuod adunay mga miingon nga mura og kompetinsiya sa Sinulog ang Pasigarbo, dili kini tinuod.

Kay kung buot hunahunaon, dili man sentro sa mga pasundayag ang Balaang Bata kondili ang tagsa-tagsa ka mga patron ug mga lokal nga produkto sa nagkadaiyang LGUs ang ilang gipasigarbo.

Ang turismo dinhi sa Sugbu usa sa mga nakatabang sa pagpalambo ug nakapadato sa lalawigan. Usa pa, makatabang sab kini pag-preserbar sa kinaiyahan kay nakita nga mokita diay niini ang katawhan kun paninduton o protektahan.

Ug kining Suroy-Suroy ug Pasigarbo makatabang sa pagpaila-ila aning mga lugara dili lang sa mga lokal nga mga turista kondili apil na sab sa mga langyaw.