Mga numero sa EJKs
7,613 ka mga armas. Maoy kinahanglang ipakita sa kapolisan ngadto sa House Quad Committee. Aron pagmatuod nga nisukol ang 7,613 ka suspetsadong durugista nga ilang napatay sa pagpatuman sa drug war ni kanhi Presidente Rodrigo Duterte sugod sa Hulyo 1, 2016 ngadto sa Hunyo 30, 2022.
Wala hulbota ang numero gikan sa buhok sa mga kongresista. Kon dili gikan sa database sa Philippine National Police (PNP). Nga ni-detalye nga ang mga nisukol maong napatay naglakip sa 7,173 ka suspitsadong drug pushers ug 440 ka suspitsadong drug users.
* * *
Ang opisyal nga mga numero nga gihatag sa bag-ong liderato sa PNP ngadto sa QuadComm nisukwahi sa pangangkon sa administrasyong Duterte sa pagkapupos sa ilang termino sa 2022 nga 6,200 ang nangamatay kay nisukol atol sa mga operasyon sa kapolisan.
Mas dakong numero nga gipahibawo sa Office of the President (OP) sa Korte Suprema, isip tubag sa mga petisyon batok sa drug war nga niresulta sa extrajudicial killings (EJKs), nga niabot og 20,322 ang nangamatay gikan sa Hulyo 1, 2016 ngadto sa Nobyembre 27, 2017.
* * *
Maong mas katuohan ang nahibaw-an sa lokal ug langyaw nga human rights groups gikan mismo sa mga tagtungod sa mga biktima sa EJKs: Kapin sa 30,000 ang EJKs sa kinatibuk-an nga unom ka tuig nga kampanya.
Mas dako pa gyod ang numero nga nahipos sa Human Rights Committee sa House of Representatives, nga nangimbestigar sa EJKs nga wala na si Duterte sa Malakanyang ug sa wala pa matukod ang QuadComm, nga kapin sa 35,000 ang nangamatay.
* * *
Makatabang sa QuadComm ang report sa United Nations Office of the High Commissioner for Human Rights niadtong Hunyo 2020: Base sa opisyal nga mga dokumento sa PNP, pito ka handguns nga managlahi og serial numbers nakit-an sa duha ka crime scenes ug duha ka handguns nakit-an sa lima ka crime scenes sa mga insidente sa Metro Manila sa Agosto 2016 hangtod sa Hunyo 2017.
Ang Department of Justice (DOJ) nga nagdalidali pagsubli sa pipila ka kaso, pagkumbinser sa International Criminal Court (ICC) nga wala pasagdi ang EJKs, nikumpisal nga walay nahimong ballistic examination, paraffin test ug pakisusi sa crime scenes.
* * *
- Latest
