Walay magpakilimos kong walay mohatag og limos

Apas sumpay sa akong lindog kalabot sa isyu sa no permit, no caroling policy sa dakbayan sa Sugbo, adunay mas dakong suliran nga gikinahanglan nilang tutokan nga dugay na kaayo kini dili lang sa panahon sa Pasko kon dili tibuok tuig. Ug kini ang mga mendicants nga nagpasayasaya lang sa daplin sa kadalanan nga misamot sa pagsiaw karong panahona.

Gani wala man mahulga kining mga tawhana bisan gipahibawo na sa Anti-Mendicancy Board nga pang-rescuehon na sila ug pamultahon kong masakpan. Wala man ni fear factor kay wala man pud sila tinud-a sa lokal nga kagamhanan sa dakbayan sa Sugbo. Hinuon basin wala pa sugdi ang rescue operation kay gipahibawo pa sila.

Atol sa gipagahigayong press conference, natuki ang isyu sa mga sakop sa minor community nga nabatasan o nahimo na nilang kultura ang pagpakilimos sa kadalanan nga sukad pa kaniadto nila kini gibadlong apan wala man gyud mopatuo.

Nasayran sa mga opisyal sa dakbayan nga dunay quota kining mga tawhana nga kong makaabot og 10 mil pesos ang ilang matigom sa pagpakilimos mopauli na usab sila sa ilang gigikanan ug duna na usay mopuli kanila.

Mismo ang community elders nila ang naproblema kay dili man maato sa pag-monitor ug labaw na nga dili nila mabadlong ang mga kapareho nila nga magpangayoan sa mga tawo sa kadalanan. Ang uban mosaka pa og mga jeep maghatag og mga sobre nga kasudlan og kwarta.

Gipangutana nako ang mga naglangkob sa board, sila mismo miangkon nga dakong hagit alang kanila ang pagsumpo niining mga tawhana. Mamamahimo man silang ma-rescue ug seminaron pipila ka oras ug dayon buhian, siyempre balik na pud sa ilang naandan nga gimbuhaton.

Ang nakitang solusyon sa kagamhanan nga apilon sa pagsilot ang mga tawo nga mohatag og limos niining mga tawhana aron wala nay magpakilomos kay mapul-an naman nga walay mohatag mopauli nalang sa ilang mga gigikanan.

Walay magpakilimos kong walay mohatag og limos, ingon ana lang ka simply ang himoon sa mga tawo aron dili manganad ang mga makililimos. Maluoy man kita ilabi na kadtong mga angayan kaluy-on apan kining mga tawhana lig-on intawon kaayo og mga lawas nga mamahimong mangita og trabaho. Apan tungod sa ilang katapolan ug gipasagdan ra pud sa mga tawo ang ilang batasan maong migara sila.

Bisan hatgan pa ni sila og panginabuhian mobalik gyud sila sa ilang naandan nga gihimo kay dali ra man kaayo sila makakuha og kwarta sa mga tawo nga mailad nila sa ilang paluoyluoy nga drama.