Marbil may pagka-devil

Nabalaka kaayo ang katilingbang tarong sa gipamahayag ni Philippine National Police (PNP) Chief General Rommel Francisco Dayleg Marbil sa usa ka interview bahin sa namalik na usab nga grabing pagdagsang sa mihinay na untang illegal drugs panahon sa pagpamunoan ni kanhi Presidente Rodrigo Roa Duterte (PRRD).

Matud ni Marbil: “At bakit may mga taong gumagamit ng drugs? Remember, hindi sila adkik…dahil gusto sila maging adik.

Remember, ang gumagamit ng drugs sa mga tao natin specially mga mll…Ayaw ko na…yong mga nagpadagdag ng oras. Kasi, kapag gumagamit ka ng drugs, gising ka…Nagdadagdag ka. Remember, ang trabaho natin, per ora dito.”

Porbida, no? Imbes istriktong palikayan ang illegal drugs, gidepensahan pa ni Marbil? Kay kuno dili lamang kini sama sa energy drink nga makapaabtik sa mga gipangduka. Kondili, nakatabang pa sa pagpalambo sa ekonomiya sa Pilipinas.

Pastilan, mora mag may pagkasintunawo na ang tuno sa iyang mga pamahayag, uy?

Unya, gisaway pa niya ang dugoong war on drugs ni PRRD. Layo ra kuno kini sa pamaagi nga gigamit ni Presidente Bongbong Marcos Jr. (PBBM) karon nga dili dugoon.

Gani, mi-us-os kuno ngadto sa 60% ang krimen sulod sa unang duha ka tuig: 2022-2024 sa administrasiyong Marcos kon ikompara sa unang duha ka tuig: 2016-2018 ni PRRD.

Daghan ang nangyamiid sa maong gipangyamyam ni Marbil. Sanglit, kon unsay iyang gipangyawit, wala man kini motugma sa tinuorayng nakita sa nagpakabanang katawhan.

Sa laktod, kinaepektibohan gayod ang war on drugs ni PRRD kay nakapahadlok sa mga kriminal ug nakapahimong luwas sa kadalanan nga pagalaktan sa tanang oras.

Samtang kang PBBM nanggawas ang nagkadaiyang matang sa kriminal, kinsa bisag adlawang dako, sayonsayon lag sulod sa balay ang target og patyon sa tumang kasayon.

Diin, may usa ka hitabo nga ultimong namatayng guwapa nga bag-ong gilubong, gipagawas sa panteyon ug gilugos! Yawan-ong binuhatan kini sa mga adik.

Pero imbes luwason ni Marbil gikan sa pagkagumon sa drugas, daw gidapigan pa hinuon sa pagpadayog subay sa kangitngit.

Alaot ang Pilipinas kay naka-PNP chief og pro-impiyerno. Busa, dili ikatingala nga diha sa iyang pagdala sa renda sa tibuok puwersa sa atong kapolisan, ang dinad-an ni Marbil may pagka-devil. Lami pa ba kining tagamtamon?