Pagbitik ni Duterte
Usa sa labing laktod nga paagi sa pagmatuod sa bangis nga mga krimen nga gipasangil batok ni kanhi Presidente Rodrigo Duterte mao ang pagmatuod sa pasangil sa lapad nga binayranay sa laktod nga pinatyanay sa iyang drug war.
Dili kinahanglang molantaw ang mga kongresista sa layo. Mahimong magsugod ang House Quad Committee sa mga testimoniya sa cash rewards nga ilang nahipos: Labing unang nipahibawo nibisto sa bayad sa mga polis nga nga nakapatay sa gidudahang mga durugista mao si Koronel Jovie Espenido. Nga wala paabutang gidasonan ni Koronel Royina Garma.
* * *
Si Espenido maoy nipahibawo nga ang kuwarta gikan sa small town lottery (STL) sa Philippine Charity Sweepstakes Office (PCSO), Philippine Offshore Gaming Operators (POGOs) ug intelligence funds. Si Garma maoy ni-detalye giunsa pag-abot sa kuwarta ngadto sa Philippine National Police (PNP): Sa regional directors, provincial directors, city directors ug sa mga polis nga aktuwal nga nakapatay.
* * *
Si Garma ang nihingalan ni “alyas Moking,” nga nailhan sa QuadComm nga si Presidential Management Staff (PMS) Assistant Secretary Irmina Espino, nga tig-deposito sa cash rewards.
Si Garma sab ang nihingalan ni Pedro Parungo, sinaligan ni Koronel Edilberto Leonardo, nga maoy tag-iya sa tulo ka pribadong bank accounts nga gisudlan ni Espino sa kuwarta. Kausa nireklamo si Parungo ni Garma nga dako na kaayong kuwarta sa accounts nga nahadlok na siyang imbestigahon sa Anti-Money Laundering Council (AMLC).
* * *
Kay ang QuadComm hingpit mang gisuportahan sa Malakanyang, dako ang kahigayonan nga gisugo na nilang AMLC pagsubay sa kuwarta gikang Espino, ngadto ni Parungo ug sangko sa bank accounts sa nakadawat nga mga opisyal ug mga sakop sa kapolisan. Mahimo ganing duna na silay ebidensiya sa binayranay atol sa sunod nilang public hearing karong Miyerkules, Nobyembre 6.
Kon mahinayon nga hingpit nang dasonan ni Leonardo ang tanang gipanulti ni Garma, mas molig-on pa gyod ang mga ebidensiya batok ni Duterte. Mao tingaling nagpataka na lang og sulti samtang gi-abibahan sa sipsip niyang mga dumadapig ug mga senador niadtong Lunes.
* * *
- Latest
