EDITORYAL - Diyosnon apan uyon sa EJK

Adlaw karon sa mga kalag, Nobiyembre 2, diin handumon sa mga buhi ang kinabuhi sa mga mitaliwan na nilang mga mahal sa kinabuhi nga naa sa mga sam-ang pinaagi sa pagduaw, pagdagkot og kandila, pagpamisa ug pagpapangadye.

Ang uban nila, dili ordinaryo ang kamatayon kay ang uban mga biktima sa krimen. Ang uban hangtud karon nangita pa gihapon og hustisya ang mga kabanay tungod kay walay napadulngan ang imbestigasyon sa ilang gidangatan.

Usa na niini kaning mga biktima sa gitawag nga extra-judicial killings. Kaning isyu sa EJK nakapabahin-bahin gyud sa mga Pilipino.

Nasamot kini og kabaniog karon tungod sa mga gihimong inquiries ug hearings sa Kongreso gikan sa Ubos Balay Balauranan hangtud sa Senado diin nahibaw-an nga dili tanang napatay sa war on drugs nalambigit gyud sa ilegal nga drugas.

Ang labing gitutokan karon sa tanan kaning pagtambong ni kanhi presidente Rodrigo Duterte sa  Blue Ribbon Committee hearing sa Senado diin iyang giangkon nga dunay Davao Death Squad, ug giako niya ang responsibilidad kabahin sa kamatayon sa mga drug suspects ubos sa iyang war on drugs ug dili niya buot papanubagon sa balaod ang mga polis kay matud niya siya ang nagsugo.

Dunay mga tawo nga dakong uyon sa EJK  ilabi na sa mga kasong ang biktima nalambigit sa mga krimen , o ba kaha nalambigit sa ilegal nga drugas.

Apan dili lang kani ang hinungdan, ang uban mga kritiko sa gobiyerno ug sa mga opisyales niini ug tingali gihalangan o ba kaha nahadlok silang ma-expose sa publiko ang ilang pagpangawat sa kaban sa publiko, gipahilom ang ilang mga kritiko.

Subo sab nga hasta mga bata o menor de edad nga walay kalambigitan sa ilegal nga drugas o politika, nangapagan, sa ngalan gihapon sa war on drugs ubos sa administrasyon ni Duterte.

Apan sa gihapon, daghan gihapon ang uyon sa mga nahitabo ug gipadaplin o wala nila hatagi og bili ang kinabuhi sa mga inosenteng nakalas.

Ang kataw-anan niini, kaning mga uyon sa EJK nangangkon nga sila dunay kahadlok sa Ginoo ug balaan gyud ang kinabuhi sa tawo bisan unsa pa siya. Labaw sa tanan, dili sab sila gustong ang ilang anak, ginikanan o kabanay mabiktima og EJK.