UV miabli sa bag-o nilang fitness gym

CEBU, Philippines — Mihatag og importansiya sa pisikal nga panglawas ug kinatibuk-ang kaayuhan sa ilang mga estudyanteng atleta ug ingon man empleyado, ang University of the Visayas pormal nga miabli sa bag-o nilang  fitness gym sa usa ka simple apan mahinungdanong seremonyas niadtong Miyerkules, Oktubre 30, didto sa UV-Main Campus sa may dalan Colon, dakbayan sa Sugbo.

Ubos sa pagpangaliya ni Fr. Russel Rupecio, ang pagbendisyon ug inagurasyon sa maong pasilidad alang sa pagpakondisyon gitambongan sa mga kadaogan sa UV nga gipangulohan ni President Dr. Conrado Iñigo, Jr. ug UV Executive Board Treasurer Dr. Leopold Lucero.

"Our new fitness gym is part of our commitment for the continuous improvement of  our facilities which can provide our students with an atmosphere conducive to academic performance and mental health," matud pa ni Iñigo.  "For our employees, this translates into greater efficiency and better performance in the workplace."

Misaksi sab sa espesyal nga okasyon sila si  UV Vice President for Finance and Quality Management System (QMS) Dr. Rosemarie Cruz-Español, Vice President for Administration Elmer Ocaba ug  UV Green Lancers team manager Eduardo "Digul" Gullas III.

Kargado sa gikinahanglan nga mga ekipo, si UV Athletic and Cultural Director Dr. Chris Mejarito nagkanayon nga ang gym alang sa strength ug conditioning training sa ilang mga atleta. Makagamit sab niini ang ilang mga empleyado nga gusto magpasingot ug magpakondisyon sa ilang lawas.

"This is in line with UV's best practices aimed at creating positive changes that are vital in building a much stronger Visayanian community," padayag pa ni Mejarito.