Danyos sa bagyo ug sunog

Gibilin ni bagyong Kristine ang milyones nga kadaut sa inprastraktura ug agrikultura ingon man 81 ka mga kinabuhi nga nakalas. Basi sa talaan sa Office of the Civil Defense ( OCD) ug National Disaster Risk Reduction and Management Council ( NDRRMC) nga 81 ka mga tawo ang namatay tungod sa bagyo nga gilangkoban sa 48 gikan sa Calabarzon ug 28 gikan sa Bicol Region, 66 ka mga tawo ang nasamdan samtang 34 pa ang pabiling gipangita kay nangawagtang.

Miabot na usab ngadto sa 4.4 milyones ka mga tawo ang apektado sa bagyo nga gilangkoban sa 1.06 ka pamilya diin 311, 468 pa kanila ang nagpabilin sa mga evacuation centers niadtong adlaw nga Sabado.

Ang NDRRMC mitaho nga miabot sa 547 ka mga dapit sa Luzon, Visayas ug Mindanao ang gilunopan ug gibahaan. Miabot usab ngadto sa 203.8 milyones ka pesos ang gibilin ni kristine sa inprastraktura diin apektado ang 98 ka mga taytayan, dalan ug mga iskuylahan.

Samtang moabot sa 87.5 milyones ka pesos ang natala nga danyos sa agrikultura nga nakaapekto sa 3,000 ka mga mag-uuma nga nakaapekto sa 1,613 ka ektarya nga umahan.

Miabot ngadto sa 83 ka mga siyudad ug municipalidad ang mipaubos sa state of calamity.

Sa laing bahin, miabot og P100 milyones ang danyos nga gibilin sa sunog na miigo sa usa ka poultry farm diin 46,000 ka mga piso ang nangapaig. Ang poultry farm may gidakon nga sobra sa duha ka libo ka metro kuwadrado.

Seguro nakabantay mo nga ang Bureau of Fire Protection mao ang pinakatihik mohatag og assessment sa danyos sa mga sunog. Pero karon akong nadiskobrihan nga may mas labaw pa diay sa BFP ka tihik ug kini mao ang NDRRMC ug OCD.

Sayonan mo, anaa lamang sa 203 milyones kapin ang damage sa mga taytayan, dalan ug iskuylahan samtang anaa lamang usab sa 87 milyones kapin ang danyos sa agrikultura nga may gilapdon nga 1,613 ka ektarya. Mibilin man gani og 100 milyones ka pesos nga danyos ang sunog sunog sa Danao nga mikaon lamang sa poultry nga may gidakon lamang nga 2000 kapin ka metro kuwadrado unsa pa kaha ang agi sa bagyo. Hinuon sila man ang mga eksperto, pero dili pod sila makabasol nako kun dili ko motuo sa ilang gihatag nga numero.