BRT nagdala’g samok

Sa laktud nga pagkasulti, nagdala lang gyud og lawgaw ug nakapasamot sa problema sa trapiko kining pagpatuman sa Bus Rapid Transit (BRT) dinhi sa Dakbayan sa Sugbo.

Abi ninyo og ngano? Ang original plan sa pagpatuman og BRT dinhi sa siyudad, ang mga bus pabiyaheon gikan sa Barangay Bulacao lahus na sa Talamban.

Anha kini magsubay sa Natalio Bacalso Avenue, liko sa Osmeña Boulevard ngadto na sa Kapitolyo, dayon liko sa Escario Street, unya Archbishop Reyes Avenue, ug lahus na sa Governor Mariano Cuenco Avenue ngadto na sa Talamban.

Ang Department of Transportation (DOTr) maoy nagpatuman niining maong proyekto, dili ang kagamhanan sa Dakbayan sa Sugbo.

Tinuod, way gasto niining maong proyekto ang kagamhanan sa siyudad, apan mao kini ang magpas-an sa grabeng problema sa kahuot sa sakyanan.

Ambot unsay nasu’d sa utok sa mga nagdumala niining maong proyekto nga wa man untay labot sa original plan ang pedestrianization project sa Osmeña Boulevard paingon sa Plaza Independencia, giapil man nila?

Wa pa gani sila makahuman sa BRT project sa mga karsada nga atong gihisgotan, naghimo na usab sila og proyekto nga makamugna og grabeng problema sa trapiko kay moresulta man kini paggamay sa karsada.

Dunay mga tawo nga kusog kaayo molaban niining BRT project ug giisip nila nga kini maoy labing nindot nga proyekto, apan miangkon nga dili kini makasulbad sa problema sa trapik.

Mag-unsa man ang BRT exclusive lane, bisan og mahuman pa, pero naa ra kini gikan sa Kapitolyo paingon diha sa Natalio Bacalso Avenue dapit sa south bus terminal?

Ang pedestrianization project nga gipagamyan ang Osmeña Boulevard kay bisan og duna nay “arcaded sidewalk” naghimo pa og laing sidewalk nga kabahin na unta sxa karsada.

Tungod niini, moabot ang higayon nga mga public utility vehicles na lang ang paagion sa Osmeña Boulevard gikan sa eskina Sanciangko paingon sa Plaza Independencia.

Kon sugdan na kini sa pagpatuman, mas mograbe pa ang problema sa trapiko kay ang mga private vehicles anha na man moagi sa mga secondary roads.

Timan-i nga kining mga secondary roads, sama sa Pelaez Street, Legaspi Street, naa pay double roadside parking nga gidumala sa Tokagawa.

Utro pa ning pagsulod sa siyudad og kontrata sa usa ka private company nga ang syudad makadawat lang og bahin nga P8.7 million sa usa ka tuig.

Ang gamay kaayong kantidad nga madawat sa siyudad gikan sa minilyon ka pesos nga kita sa Tokagawa, maoy bugti sa grabeng kahasol sa trapiko, kay ang lapad nga karsada gihimong parking area.

Angay nga dili na paparkingan ang mga secondary roads nga ania mahimutang sa downtown area, ug ang mga private sectors maoy maghimo og kaparkingan ug sila ang mangolekta sa bayad.