Subrang pagsalig

Nakabantay ko nga daghan ang nalipay sa administrasyon ni Cebu City Mayor Raymond Alvin Garcia kay namenus-menos ang kalangan sa pagbayad sa mga obligasyon sa siyudad.

Sama pananglid sa mga senior citizens, nangalipay ang mga senior kay pananglit ang hatagan kanila sa Hulyo, Agosto ug Septiyembre, gihatag sa unang semana pa lang sa Septiyembre.

Sa buwan sa Oktubre, Nobiyembre ug Disyembre, gipasalig ni Raymond nga ihatag na kini sa unang semana sa Disyembre.

Ingon usab niini ang gihimo sa siyudad ngadto sa mga sakop sa tanod, Lupon ug ubang kawani sa kabarangayan dinhi sa dakbayan nga dunay kubrahonon nga honorarium sa City Hall.

Wa pa ko makasusi kon ingon ba usab niini ang gihimo sa siyudad sa bayranan ngadto sa lainlaing mga ospital kabahin sa City Hospitalization and Medical Program (CHAMP).

Kaniadto, sus, tagdugay kaayo mabayaran sa siyudad ang mga ospital mao nga dunay mga ospital nga mo-limit na sa pasyente nga ilang dawaton kon ang bayad ipaagi sa CHAMP.

Duna gani ospital nga modawat man tuod og CHAMP, apan pabayron gyud usa nila ang tagtungod sa pasyente, ug kon mabayran na sila sa CHAMP, ulian ra nila ang tagtungod sa mga pasyente sa ilang nabayad.

Mao ni ang nakaayo kon ang usa ka mayor motutok gyud sa iyang pagdumala sa siyudad. Si Mayor Michael Rama kaniadto gitambagan gyud nako nga maayong di na lang siya mag-chairman sa League of Cities.

Ngano man? Tungod sa iyang pagka chairman, dili man nimo kalikayan nga mobiyahe siya sa Manila kay motambong sa miting uban sa mga opisyal sa liga.

Pero giingnan ko ni Rama nga wa kuno kaayo siya magsige’g travel nga may kalabotan ang League of Cities. Apan ang tagdugay kaayo niyang biyahe sa gawas sa nasud uban sa iyang pamilya, usa kini sa nakaapekto sa iyang katungdanan.

Matud ni Rama nga duna man siya’y city administrator, duna siya’y mga department heads nga maoy nagpadagan sa tagsa-tagsa nila ka mga katungdanan.

Ang akong ikasulti nga lahi gyud kon ikaw nga usa ka mayor nagtutok sa mga gimbuhaton sa siyudad. Aw, tan-awa kon unsay nahitabo karon, ang iyang pagka suspenso, ug pagka dismiss sa katungdanan, nagpasabot ba kini nga nakahimo sa ilang tahas ang iyang mga sinaligan?

Wa ko mag-ingon nga dili na lang gyud mo-travel ang mayor, apan kon subsob na sab gani, unya tagdugay kaayo nga molungtad og usa ka buwan, para nako dili na usab maayo.

Unta, pinaagi sa mga nanghitabo karon ni Rama, mabuka na ang iyang mga mata nga ang subra ra nga pagsalig, dili gyud maayo.