Liderato ni Risa
Ang wala kasugod ug wala kalahutay og subay sa labing unang public hearing sa Senado nga naglakip ni Apollo Quiboloy human sa iyang pagkapriso nahibulong tingali nganong si Senador Risa Hontiveros ray ilang nakit-an nga nangutana sa resource persons.
Wala tingaling kabantay nga nitambong kadiyot silang Senador Koko Pimentel ug Senador Francis Tolentino. Tingali nipakita lang aron dili kapasanginlan nga gipasagdan nila si Hontiveros. Ug tingali nibiya dayon aron nga dili mapiskan sa kasuko sa mga dumadapig ni Quiboloy–labi na si Tolentino nga magpapili para sa ikaduhang termino sunod tuig.
* * *
Pero ang kakuwang og interes sa ubang mga senador sa kaseryuso sa mga pasangil sa pagpanlugos sa kabataan ug kababayen-an batok ni Quiboloy ug sa katalagsaon sa pagkapugos niya sa pag-atubang sa Senado human sa tunga sa tuig nga pagtago nimatuod lang sa kaligdong sa determinasyon ni Hontiveros.
Nangahas siya paghatag og tingog sa mga biktima dihang walay opisyal sa gobyerno nga nangisog paghagit sa gahom ug influencia ni Quiboloy. Hinaut nga ang paglaom sa hustisya nga bunga sa iyang paningkamot makadasig sa mas daghang mga biktima sa inhustisya.
* * *
Nakumbinser ang mga biktima ni Quiboloy sa pagdangop ni Hontiveros human sa pagbungkag sa kulto sa Surigao del Norte ug pagpapriso sa pangulo nga si Jey Rence “Señor Aguila” Quilario ug ubang mga opisyal sa Socorro Bayanihan Services Inc.
Si Hontiveros sab ang nibisto sa mga bakak ni Alice Guo ug sa bangis nga mga krimen sa ilegal nga Philippine Offshore Gaming Operators (POGOs) dihang ang administrasyon nagpahimulos pa sa nangalisbong kabilin ni kanhi Presidente Rodrigo Duterte.
* * *
Mahimong nakatsamba lang si Hontiveros. Kay mahimong giduphan gihapon sa Malakanyang si Quiboloy kon wala pa mabungkag ang UniTeam. Ug mahimong panguwartahan gihapon ang POGOs kon wala pa mabisto nga mas nabuhong sa binilyon ka pesos nilang kita ang kampo sa mga Duterte.
Pero napakita ni Hontiveros ang tinuod nga liderato. Ang pagbarug para sa katarung bisan sa dagkong hulga ug pagpangita sa kamatuoran bisan sa lapad nga ka walay kaseguroan. Ug pag-insistir nga dili mapadaplin ni masapawan ang maayong kawsa. Taliwala sa linigwatay sa puwersa sa kangitngit ug sa puwersa sa, nakatag-an ka, kadaotan.
* * *
- Latest
