Nakakat-on na gyud ang mga LGU sa Sugbo

Maayo ang gihimo sa lokal nga kagamhanan nga sayo nidesisyon sa pagsuspenso sa klase sa mga tunghaan subay sa nasinating epekto sa bagyong Kristine bisan.

Particular nga mihimo sa unang lakang si Cebu City Acting Mayor Dondon Hontiveros kinsa sayo kaayo mipagawas og executive order sa pagsuspenso sa klase sa tanang level sa mga tunghaan pribado ug publiko nga gisundog usab sa ubang mga kasikbit nga dakbayan sa Lapu-Lapu, Mandaue ug ubang mga kalungsoran ug dakbayan sa lalawigan sa Sugbo.

Naunhan pud sila ni Dondon sa paglugway sa suspension sa klase nga sayong mipahibawo aron dili mabawo ang mga tinun-an ug mga ginikanan ug sa samang higayon mao usab ang gihimo sa ubang mga LGU. nakapuntos si Hontiveros sa dabkayan sa Sugbo niining iyang gihimo nga nagpakita sa pagpakabana sa kaluwasan sa mga estudyante nga dili mahinayak pag adto sa mga eskwelahan.

Kini maoy sakto nga hukom sa mga local chief executives nga dili magpanuko sa paghimo og lakang basta kinabuhi na sa katawhan ang nakataya.

Mas maayo nga uniform ang mga lakang nga himoon sa mga LGU ilabi na sa tri-cities kay dinhing dapita ra ba mahimutang ang mga dagkong kolehiyo ug unibersidad.

Bisan sa maayong tumong sa mga lider sa mga LGU, aduna gyud gihapoy manaway kay lagi nagsuspenso og klase unya dili man diay ingon niana ka grabe ang sitwasyon itandi didto sa Luzon. Matud sa uban gausik-usik lang sa adlaw nga maklasehan unta. Pastilan ning utoka maayong labhan sa ka oplok mangita gyud og bangag aron manaway kay lagi overacting ra kuno ang gihimo.

Mas maayo nga masobrahan kay sa magkuwang nga mosangpot sa dakong palpak simbako lang kay dili na baya nato matag-an ang mausab usabon nga kahimtang sa panahon karon busa angayan lang nga pangandaman kini og maayo. Basta unahon gyud kanunay ang kaluwasan sa kinabuhi sa mga nilalang, dili lang mga tawo kon dili apil ang kahayopan kay apektado man ang tanan.

Sa panahon karon kinahanglan nga dili magpanuko ang mga lider sa paghimo og mga lakang aron malikayan ang mga panghitabo nga kamahayan sa kauwahian. Maayo unta kong ingon na niini ang template nga ilang pagahimoon labaw sa tanan, ang mindset sa mga local chief executives ug mismo sa depEd nga magkahiusa pagproteher sa mga tinun-an.

Samtang alang sa mga ginikanan o sa matag usa kanato, kita na ang mohukom kong unsa ang angayan natong buhaton kong tan-aw nato nga mabutang kita sa peligro ug ang atong mga anak. Kita na ang modesisyon kay sa maghuwat pa sa pahibawo gikan sa kagamhanan aron dili kita masugamak sa kabangis sa kinaiyahan.