EDITORYAL — Mas maayo pang motabang

Nagkinahanglan karon og tabang ang Bicol Region tungod sa grabeng mga baha dala sa bagyong Kristine nga miigo sa nasud sugod pa sa miaging mga adlaw.

Daghan sa mga balay ang gipanglunopan diin ang uban abot sa atop ang gilawmon sa tubig, hinungdan nga ang mga tawo nga naabtan adto nalang nipahipi sa ilang mga atop samtang nagbunok ang uwan.

Si kanhi bise president Leni Robredo kinsa lumad nga taga Naga City sa Camarines Sur nanawagan sa tanan ilabi na sa gobiyerno pagpangayo og tabang para sa mga apektado.

Ang iyang non-government organization nga Angat Buhay kasamtangan na karong nangapud-apod og mga hinabang sa mga biktima didto.

Ang gobiyerno ni Presidente Ferdinand Marcos Jr. sumala pa sa report sa Philstar.com, misanong sa panawagan ug mipakuha og mga rubber boats, ang uban gikan pa sa Mindanao, aron dad-on sa Bicol alang sa rescue operations.

Dili unta sagulan og politika ang mga nahitabo karon didto. Kay mao nay naandan sa mga hakog sa gahum nga gamiton ang kasakit ug kalisdanan sa mga biktima sa katalagman aron lang makaabante sa ilang mga karibal o makaribal palang sa politika.

Nahitabo kini sa panahon ni kanhi president Benigno Aquino III dihang naigo ang nasud sa Super Typhoon Yolanda.

Daghan ang mga pasangil nga wala atimana ang mga biktima bisan gihimo na tanan sa gobiyerno kutob sa mahimo niini aron matabangan ang mga apektado.

Sa dili pa unta manaway ug mangdaut ang mga nangambisyon og posisyon, hunahunaon unta nila sa makadaghang higayon kun silay natungnan nga naglingkod sa pwesto dihang niigo ang katalagman, kun kaya ba pud kaha nila. Kay kining nagkagrabeng mga katalagman mugna sa kinaiyahan dili kini tungod sa pagpasagad sa kasamtangang naglingkod nga mga lider sa nasud.

Epekto kini sa Climate Change ug dili ang Pilipinas ang hinungdan kondili ang tanang kanasuran sa tibuok kalibotan.

Imbes nga mangdaut para mogawas nga maoy tarong, mas maayo pa tingaling maghilom nalang ug motabang sa mga naapektahan.