Pasiunang kadaugan

Sigurado na nga maapil ang mga pangan nilang dismissed mayor Michael Rama ug Jonas Cortes sa listahan sa mga kandidato pagkamayor sa syudad sa Sugbo ug Mandaue alang sa umaabot 2025 midterm elections.

Kini human ang Korte Suprema miluwat og Temporary Restraining Order (TRO) nga nagpugong sa Commission on Elections (Comelec) pagpatuman sa resolution 11044-A nga nagmando sa pagkanselar sa certificate of candidacy sa mga kandidato nga dunay silot nga perpetual disqualification gikan sa buhatan sa Ombudsman.

Ang TRO nagpasabot nga bisan sila si Rama ug Cortes nag-atubang niining maong silot suma sa disisyon sa Ombudsman nga nagkonbikto nila sa mga kasong ilang giatubang, makahimo pa gihapon sila sa pagpapili sa umaabot eleksiyon. Maisip ni nga pasiunang kadaugan alang nilang Rama ug Cortes.

Ug anaa na nilang duha unsaon paggamit ang maong kadaugan aron magmalampuson sa tagsa-tagsa nila ka kandidatura. Usa ka butang ang sigurado, ang TRO makapausab sa kamada sa suporta sa mga lider sa politika ug sa mga botante mismo.

Ang mga kaatbang nilang Rama ug Cortes kinahanglan sab nga mohimo og dakong adjustment sa ilang mga paagi sa kampanya. Dinhi sa dakbayan sa Sugbo, dako ang hulga nga sagubangon ni Mayor Raymond Alvin Garcia nunot sa hukom sa Korte Suprema.

Dili na siya mahimong mokampanti nga siya ang naglingkod sa City Hall ug makabintaha sa makinarya tungod kay posibling ang mga lider sa politika nga napugos lang pagdapig niya tungod sa kabalaka nga di na gyud makadagan si Rama mobali sa ilang suporta.

Lahi hinuon ang sitwasyon sa Mandaue tungod kay sa akong obserbasyon way epekto kang Cortes ang iyang kaso. Numero uno, kontrolado gihapon niya ang City Hall bisan kun siya gitangtang sa Ombudsman tungod kay loyal man niya iyang bise mayor nga si Glen Bercede.

Gawas pa daw sa nihugot hinuon ang suporta sa mga Mandawehanon kang Cortes tungod sa nahitabo niya. Kun imong tun-an ang kinaiya sa mga botante sa Mandaue, lahi kaayo kun itandi dinhi sa dakbayan sa Sugbo tungod kay mas importante sa mga taga Mandaue ang ilang pamilya o clan.

Ug mao ni bintaha ni Cortes kay solid ang tibuok niyang clan ug ang iyang mga dumadapig labi pa karon nga mas nigawas hinuon siya nga underdog.