Necrophilia

Patay nga lawas sa 22-anyos nga nalubong na sa sam-ang Katoliko sa dakbayan sa Carcar ug pila na ka adlaw ang gihaw-as sa iyang lubnganan ug giingong gipahimuslan sa lima ka tawo.

Ang amahan sa patay nagduda sa tigbantay sa sam-ang nga usa sa mitamas-tamas sa  iyang anak.

Kaso kini sa necrophilia. Ang necrophilia usa kini ka matang sa pagpakighilawas ngadto sa usa ka patay. Kun wala ko masayop una kini dinhi sa Sugbo apan daghan na kini dinhi sa Pilipinas. Wala pay balaud dinhi sa nasud nga direkta nga nagsilot sa necrophilia.

Niadtong tuig 2010 si Senador Manny Villar nagpalabang og balaudnon, Senate Bill 1297 nga maghimong kriminal sa makahimo og necrophilia. Apan sa akong gihimo nga pagsusi daw sa wala kini mapalabang sa Senado ug sa kinatibokang Kongreso tungod kay niadtong tuig 2011, usa ka 15-anyos nga dalagita nga namatay sa aksidente sa dalan sa Maria Aurora, Aurora ug tulo na ka semana nga nalubong ang gikawot sa tulo ka mga lalaki ug gipahimuslan. Gani sigun sa imbestigasyon sa kapolisan hapit na madugta ang lawas sa dalagita ug may nanggawas na nga ulod sa lawas niini. Ang tulo ka responsable gipasakaan lamang sa kapolisan og kasong desecration of a dead body and malicious mischief ug dili necrophilia.

Sa Digos City sa Davao del Sur, nakit-ang naa na sa gawas sa iyang lungon nga wala nay sapot ang 84-anyos nga giingon sa kapolisan nga gipahimuslan sa mga batan-on.

Kasagaran sa mapasanginlan og necrophilia mao ang mga embalmer tungod kay duol sila sa tentasyon ilabi na kun ang ilang balsamahon mga adunay dagway. Ang tentasyon duol kanila tungod kay duha lang sila sa imbalming room, ang embalmer ug ang iyang balsamahon nga makita ang tibuok hubo nga lawas niini. Kay pahimuslan man gani ang patay nga dugay nang gilubong kana pa kahang patay nga init-init pa?

Angayan na seguro nga mapalabang na sa Kongreso ang balaudnon nga direktang maghimong kriminal sa necrophilia. Mas maayo pa seguro nga kini ang unahon sa mga magbabalaud sa pagpalabang kay sa pagsige og balik sa ilang imbestigasyon da Philippine Offshore Gaming Operators (POGO) ug extrajudicial killings.