Mahalon nga bag

Ang mga babaye garbo kaayo nga makaangkon sila og mga mahalong bag, mga branded, apan nangandoy nga mapalit ra nila ni sa barato nga prisyo.

Tungod niini, duna say mga tawo nga migamit og inantigo nga paagi, naghimo sila og mga peke nga bag nga kon imong tan-awon, susama gyud sa original nga branded bag.

Kon mga sinena man gani, duna sa’y namaligya og mga peke nga T-shirt nga makailad sab kay susama man gyud kini sa original nga mga branded, unya ang prisyo niini barato ra.

Paniid nako, dili ra kay mga branded nga bag ug sinena ang gi-peke, kondili apil na ang mga pyesa sa mga sakyanan. Duna pay report gani nga gipeke na sa mga Insik ang bugas.

Nahibu’ng bitaw ko kay nakakita ko nga daghan man sa akong mga amiga nga mipasigarbo sa ilang mga branded nga bag, ug miingon nga barato ra kuno ang ilang pagpalit.

Sus, mao diay nga daghang nakaangkon og barato nga branded bag kay daghan diay nga namaligya og fake bags diha sa usa ka mall sa Mandaue.

Tiaw mo nga 33 ka tindahan sulod sa usa ka mall diha sa Mandaue ang gi-raid sa National Bureau of Investigation (NBI) sa miaging Huwebes.

Si John Ignacio nga maoy team leader sa Manila-based NBI-Intellectual Property Rights Division miingon nga nangayo’g tabang kanila ang kompaniya nga tigbaligya sa branded nga bag.

Pastilan no, kon makakita ta og mga babaye nga branded og bag nga susama sa mga gisakmit sa NBI, makaduda na ta nga peke ni.

* * *

Unsa ni? Si Senador Ronald “Bato” Dela Rosa miawhag og Senate Inquiry kabahin sa giingong extrajudicial killings atol sa administrasyon ni kanhi presidente Duterte nga siya maoy PNP Chief?

Mora’g kataw-anan tingali kay mopaingon man kaniya ang imbestigasyon niini sigun sa gibutyag ni Koronel Jovie Espenido ngadto sa mga kongresista.

Ang maayo tingali niyang himoon, kalimtan usa ni Dela Rosa nga siya usa ka senador, ug moatubang siya sa mga kongresista nga sakop sa Quad Committee nga nag-imbestigar karon sa Extra Judicial killings.

Tubagon niya ang gibutyag ni Koronel Royina Garma nga duna gyuy mga sipyat ang pagpatuman sa War on Drugs ni kanhi presidente Duterte.

Kon maghimo gud og laing imbestigasyon ang Senado, magduda ang katawhan nga ang katuyoan ni Dela Rosa ug Senador Bong Go mao nga maabswelto sila sa kalambigitan sa mga palpak sa extrajudicial killings.

Ako hinuon makamatuopd man nga daghan sab sa mga napatay atol sa administrasyon ni Duterte mga nalambigit sa ilegal nga drugas, apan may mga naangin lang.