EDITORYAL - Di ba mura og bakikaw?

Gipahibalo ni Senador Ronald “Bato” Dela Rosa nga mopatawag siya og Senate inquiry bahin sa extra-judicial killings sa panahon ni kanhi presidente Rodrigo Duterte sa dugoong war on drugs sa naulahi.

Si Dela Rosa mao ang tsirman sa Senate committee on public order. Walay balaod nga nagdili kaniya paghimo og susamang inquiry sama sa gihimo karon sa quad-committee sa Ubos Balaybalauranan.

Dunay gahum ang Senado sa paghimo sab og susamang hearings nga gitawag og parallel inquiry, makaimbitar og sa ngalan sa “in aid of legislation” o pagpupo og mga pagtulon-an gikan sa mga resource persons aron makapanday og mas maayo ug epektibong mga balaod.

Apan makatarunganon sab ang pagkwestyon sa daghang mga magbabalaod kabahin sa plano ni Dela Rosa tungod kay usa siya sa mga giimbestigar kabahin sa EJK isip mao ang hepe sa kapolisan sa panahon ni Duterte.

Usa siya sa gidudahang adunay kasayuran sa war on drugs isip lider sa kapolisan nga maoy nanguna sa kampanya. Kun ang rekord sa gobiyerno mao ang tuohan, moabot 6 mil ang napatay atol sa war on drugs kay giingong “nanglaban.”

Apan ang human rights groups miingon dili momenus 30 mil ang tinuoray nga napatay atol sa maong kampanya.

Ug mao kini karon ang giimbestigahan sa International Criminal Court sanglit ang mga napatay drug suspects gikatahong biktima sa summary executions, walay nangahas pagreklamo tungod sa kahadlok.

Si kanhi PCSO general manager Royima Garma kinsa suod ni Duterte miwadwad sa quad-committee bahin sa reward system ug Davao model nga kampanya batok sa ilegal nga drugas.

Si Dela Rosa giakusahan sa gipasanginlang druglord nga si Kerwin Espinosa nga nipugos kaniya sa pagduhig sa pangalan ni kanhi Senador Leila De Lima sa illegal drug trade, nga kusganon sab gihimakak sa maong senador.

Dili ba muran og bakikaw kaayong paminawon nga ang giimbestigar mao naman hinuoy moimbestigar sa iyang kaugalingon, unya sa kaugalingong tugkaran niya kini buhaton?

Hain naman ang kaikog ug kaakohan ngadto sa katawhan aning planoha kung mahitabo man? Unsa may katarungan ug hustisyang makuha gikan niini kun pananglitan mahitabo nga mohimo og kaugalingong inquiry bahin sa EJK ang Senado ubos sa komitiba sa maong senador?