Mga hingalimtanon

Nagpadayon karon ang imbestigasyon sa Quad Committee nga gipangulohan sa overall chairman niini nga si Kongresista Robert Ace Barbers mahitungod sa extra-judicial killings (EJK) nga nahitabo panahon sa administrasyon ni Presidente Rodrigo Roa Duterte sa dihang gilusad niini ang iyang War on Drugs nga mikotlo og lboan ka mga kinabuhi.

Sa miaging semana human maapiki sa mga pangutana ug sa pagpapriso kaniya sa Quad Committee gitudlo sa retiradong opisyal sa kapolisan sa dakbayan sa Sugbo nga si Col. Royina Garma nga si Presidente Rodrigo Duterte ang nagmando sa pagpatay sa mga tawo nga nalambigit sa gidili nga drugas. Nalakip sa giingong kamandoan ang mga tawo nga nagpalibot sa Presidente sama nila ni Senador Bong Go ug Senador Bato Dela Rosa. Hinuon silang duha pulos nanghimakak sa ilang kalambigitan sa EJK.

Sa iyang emosyonal nga pahayag, giingon ni Senador Bong Go nga ang mga nagsaway karon sa gipasangil nga EJK mao ra usab kadtong mga tawo nga miabiba ni Presidente Duterte matag State of the Nation Address (SONA) diin gibida niini ang iyang War on Drugs.

Dili na ta matingala sa pagkahingalimtanon sa mga kongresista. Ang kasaysayan sa Pilipinas nagsulti nga ang mga Pinoy hingalimtanon. Mobo ra ang atong memorya. Dili ba gipalagpot man sa katawhang Pilipinhon ang diktador nga si Ferdinand Edralin Marcos Sr. ang amahan ni Presidente Bongbong Marcos tungod sa abuso sa katungdana, korapsyon ug gipalayas? Pero gipabalik sila sa Pilipinas ug gihatagan pa gayod sa pinakataas nga katungdanan sa nasud hasta ang iyang mga kaliwat. Kining tanan nahitabo tungod sa pagkahingalimtanon sa mga Pinoy.

Ang mga kongresista nga nag-imbestigar karon sa giingong EJK panahon ni Presidente Duterte mao ra pod ang mga kongresista nga abot sa dunggan ang ngisi sa pag abiba ni Duterte matag higayon nga ibida niini ang iyang war on drugs. Walay usa kanila sa Ubos Balay Balauranan kun wala ko masayop ang misaway sa EJK, gani sila ang mga kongresista nga mihatag og zero nga budget sa Commission on Human Rights (CHR) tungod sa pagsaway sa CHR sa EJK. Hahay, ang pagkahingalimtanon naman lang g'yud.