Sipyat sa War on Drugs

Giangkon ni kanhi Cebu City Police Office (CPPO) director Royina Garma nga duna gyuy mga sipyat sa gihimong war on drugs, usa ka pag-angkon nga makahatag og kauwawan sa kapolisan.

Ang pag-angkon ni Garma iyang gihimo atol sa Quad Committee hearing sa Kongreso, diin siya padayong gitanggong sa mga kongresista samtang magpadayon ang hearing.

Wa gyud hinuon gitumbok kon hain sa mga kaso dinhi sa Cebu City nga dunay gidudahang nalambigit sa drugas nga napatay, apan nasipyat ra diay.

Apan dunay mga iladong tawo dinhi sa siyudad nga napatay usab atol sa War on Drugs, nga bisan kami nga sakop sa media nasayod nga kadtong napatay nalambigit gyud sa drugas.

Aw hinuon, ang pagpatay kanila, gihimo nga wa masubay sa rules of engagement. Lahi ra sa gihimo sa mga NBI agents dihang napatay nila ang polis nga si Adonis Dumpit didto sa Bohol, kay enkwentro man gyud to.

Dunay mga napatay nga nagsakay lang sa awto, unya gisundan og mga killers, ug gipusil. Duna sab hinoo’y mga abogado nga gipatay, ug wa ko magtoo nga apil to sila sa drugas.

Posible nga ang maong mga abogado ug prosecutor nga gipatay, milaban to sa mga tawo nga target nga patyonon sa mga gitahasan sa pagpatuman sa War on Drugs.

Usbon nako nga kon nakahimo man og kalapasan ngadto sa mga sibilyan nga naangin lang ang War on Drugs ni kanhi Presidente Duterte, apan nakahimo usab kini og kaayohan kay napuo man sab ang mga “untouchables” kaniadto.

Apan kay nakahimo man kaha sila og salaod, angay usab silang silotan kon mapamatud-an man gyud sila nga sad-an.

Klarohon lang nako nga ang hearing sa Quad Committee sa Kongreso, dili maoy makapapriso nilang Garma ug ubang mga responsable sa giingong sipyat sa pagpatuman sa War on Drugs.

* * *

Moalegre na gyud sa dili madugay ang South Road Properties (SRP) kay butangan na og terminal sa mga public utility vehicles ang dapit sa Il Curso ug sa SM Seaside.

Sa ato pa, sayon na lang unya ang pag-adto sa mga tawo sa SRP, dili sama karon nga kinahanglan pa silang mosakay og taxi, habal-habal, ug maghuwat kon dunay service vehicle sa SM nga ilang masakyan.

Mao ni ang kalamboan human nga si Konsehal Rey Gealon gitudlo ni Mayor Raymond Alvin Garcia nga chairman sa SRP Management Committee.

Gani sa among miting sa Cebu City Traffic Management Board kaniadtong Martes, giawhag na ni Konsehal Gealon ang mga transport operators nga mosugod na pagplano alang sa pagdestino sa ilang mga sakyanan sa maong rota.