Ang mga hudas ni Digong

Nabali na gyud ang panahon karon, kaniadto ang mga kontrabida kadtong mga nalambigit sa drugas nga daw mga ilaga nga nagpangita og katagoan kay lagi gigukod sa mga mabangis nga iring nunot sa gipatuman nga all out war sa kanhi administrasyong Duterte batok sa illegal drugs, gani ang tanan nga mga opisyal apil na ang mga senador ug kongresista magsige og dayeg ug mopalakpak sa higayon nga hisgotan ang kampanya batok sa illegal nga drugas.

Kada State of the Nation Address ni FPRD kaniadto makapabungog nga palakpak ang molanog gikan sa mga senador ug sa mga kongresista gawas lang niadtong mga mibarug batok sa patakaran pagpuhag sa mga nalambigit sa illegal drugs.

Apan karon nakabalos na ang mga giakusahan nga mga durugista kay sila ang gigamit aron maduot ang kanhi administrasyon sa nahitabong extrajudicial killings.

Giutingkay ang tanan nga murag nanghinguto ang mga magbabalaod aron mapuga ang ilang mga giimbitihan mga mga resource persons aron makasuka sa ilang nahibaw-an ug personal nga kalambigitan. Sama sa kanhi PCSO General Manger ug kanhi CCPO Director Royina Garma nga unang gilambigit sa kamatayon sa usa ka opisyal sa PCSO hangtud nga nipadayon laing panid sa iyang sugilanon nga mao ang pagtumbok na karon kang Digong nga responsable sa nahitabo kaniadto sa gubat batok sa illegal drugs diin hilabihan usab ka daghang kinabuhi ang nakalas.

Dinhi nato makita ang kinaiya sa mga politiko kung si kinsa kadtong anaa sa gahum didto sila motila pagmaayo diin kalimtan nila ang tanan apil na ang ilang dignidad aron maseguro lang nga dili sila mawani sa kasamtangan nga anaa sa gahom, pana panahon gihapon, ang kadtong hilabihan ka loyal karon, apan pag abot sa panahon sila diay ang hudas nga nagtakuban lang.

Dili lang gani sa national nga panghitabo apil na sa local setting, sa dakbayan sa Sugbo dihang si dismissed Mayor Mike Rama pa ang nagdala sa syudad hilabihan ka tila ang tanang mga opisyal ug mga kawani mismo kaniya, apan dihang tagilid na siya dalia ra nakatapon sa kampo ni Mayor Raymond Alvin Garcia ang mga tawo nga paling paling, dili pud nato mabasol kay naa man pud lagi personal nga katuyoan nga mao ang survival.

Balikan nato ang nahitabo sa national, halos tanan mitalikod na kang Duterte ug ang nagpabilin kadtong labing suod nalang niya, dili pa gani ni seguro kay basin sa umaabot kini sila maoy moduot pa sa kanhi presidente ngadto sa kaalautan aron lang sila maluwas, andam nilang traydoron ang tawo nga usa ka higayon niana nahimong kabahin sa ilang kalamposan.

Kining mga tawhana dili angayan nga saligan sa kasamtangan nga administrasyon kay moabot ang panahon nga ang gibuhat sa kaniadto nilang gisuportahan mahitabo usab karon nga mohimo og pagbudhi tungod sa ilang kahangol sa gahum.