EDITORYAL - “Mother tongue” maoy gamiton sa klase

Kontrobersyal nga balaod nga Mother Tongue Law hingpit nang nahimong balaod. Kini bisan pa man og dunay mga nisaway niini ilabi na sa habig sa mga magtutudlo ug sa mga kahugpongan sa mga ginikanan.

Wala pa gani kini mag-usa ka buwan Republic Act No. 12027 gikan kini gikonsiderar nga pasado na isip usa ka balaod sugod Oktobre 10, 2024 aduna nay mga panawagan sa pag-repeal niini.

Ang maong balaod nga pag-amendar sa Enhanced Basic Education Act of 2013  dugay ng gidala sa lamesa ni Presidente Ferdinand “Bongbong”Marcos Jr. ug naabtan nalang kini sa tagal nga wala niya mapirmahi.

Ubos sa balaod, ang mga balaudnon nga giduso ngadto sa buhatan sa presidente gikan sa Kongreso una pa mahimong balaod kinahanglan una kining basahon ug pirmahan sa pangulo.

Kung iyaha kining pirmahan otomatiko kining mamahimong balaod, kung dili niya kini pirmahan o iyang i-veto, dili kini mapasar apan pwede sab i-override sa Kongreso ang presidente pinaagi sa botasyon.

Apan kun sa sulod sa 30 ka adlaw gikan naabot sa lamesa sa presidente ang balaudnon nga dili niya mapirmahan, o ba kaha dili niya i-veto, otomatiko kining mahimong hingpit nga balaod,

Ang maong kontrobersiyal nga balaod, nagmando sa tanang mga eskuylahan sa nasud nga kinahanglang gamiton ang lokal nga pinulongan sa pagtudlo sa mga bata gikan sa Kindergarten hangtud sa Grade 3, nga unta , opsyonal lang kaniadto.

Ang DepEd dunay kasamtangang Mother Tongue-Based Multilingual Education (MTB-MLE) program nga diin ang mga magtutudlo mogamit og lokal nga pinulongan sa ilang pagtudlo sa mga tinun-an sa tuyo nga mas makasabot ang mga bata sa leksyon.

Samtang sayon kaayong paminawon, apan makasabot ba gyud kaha ang mga bata gamit ang pinulongang lokal sa ilang mga leksyon.

Ilabi na nga sagad sa mga palibot karon gikan sa mga galamiton sa balay, appliances, mga traffic signs, mga label sa mga produkto ug daghan pang uban nakasuwat man sa English. Dili ba mas mosamot og kaihalas ang mga bata sa English kun ini og abot pa nila sa grade 4 sila magsugod og sabot English. Usa pa, mura man hinuon og paatras imbes nga paabante ang paglambo sa mga bata kung mao ni buhaton.