Gihimong pahoy ang PNP
Walo ka hepe sa Philippine National Police (PNP) ang natudlo ni kanhi Presidente Rodrigo Duterte sa unom ka tuig niyang pagdumala sa Malakanyang. Usa nila, si Heneral Camilo Pancratius Cascolan, nga naghupot sa puwesto sulod lang sa tulo ka buwan (Septiyembre hangtod Nobyembre 2020), namatay tungod sa sakit sa niaging tuig.
Ang nahibiling pito maoy gisugo ni PNP Chief Rommel Marbil sa pagpasabot, atubangan sa pasangil ni Koronel Royina Garma sa makabuhong nga binayranay sa kada suspitsadong durugista nga napatay, giunsa nila pagpatuman ang kampanya ni Duterte batok sa ilegal nga drugas.
* * *
Kon tinuod ang sulti ni Garma sa iyang bag-ong affidavit, gihimong pahoy ni Duterte ang mga hepe ug ubang tag-as nga mga opisyal sa PNP: Gipa-amen silang tanan ni Koronel Edilberto Leonardo. Nga tungod sa rekomendasyon ni Garma maoy gisaligan ni Duterte sa pagpatuman sa ‘Davao template’ sa tibuok Pilipinas.
Si Leonardo mao ang nipahibawo nila sa iyang gilista nga suspitsadong mga durugista, sa iyang gihimong sistema sa binayranay ug sa nagkalainlaing kategoriya sa bayad sa mga napatay agad sa ilang ranggo nga si Leonardo ra sab ang nagtakda.
* * *
Ambot motuman ba, niang pito ka mga kanhi hepe sa PNP ni Duterte (ug gidugayon sa ilang paghupot sa puwesto) nga naapil sa sugo ni Marbil:
Senador Bato dela Rosa (Hulyo 2016-Abril 2018); Heneral Oscar Albayalde (Abril 2018-Oktubre 2019); Heneral Archie Francisco Gamboa (Oktubre 2019-Septiyembre 2020); Heneral Debold Sinas (Nobyembre 2020-Mayo 2021); Heneral Guillermo Lorenzo Eleazar (Mayo-Nobyembre 2021); Heneral Dionardo Carlos (Nobyembre 2021-Mayo 2022); ug Heneral Vicente Danao Jr. (Mayo-Agosto 2022).
* * *
Gibisto sab ni Garma ang kuwestiyonableng sukaranan sa drug war ni Duterte: Ang lista ni Leonardo sa gidudahang mga durugista gikan sa Bureau of Corrections (BuCor); maoy gibasa ni Duterte ug gipasidan-ang pamatyon; may mga ngalan nga nag-doble, nag-triple ug wala magtakdo; gipun-an ang lista sa mga ngalan nga nahisgutan ni Duterte sa iyang mga diskurso (maong naapil ang mga karibal sa politika ug personal nga mga atraso); ug gawas ni Duterte si Leonardo ray nagbuot unsay mga ngalan nga gidugang o gitangtang.
Maong nisamot kalig-on ang pagduda: Nga ang kampanya ni Duterte wala itumong pagsulbad sa drugas kon dili pagpapas sa kumpetensiya.
* * *
- Latest
