Hinukad sa dughan sa anak ang pag-atiman sa ginikanan

Hangtud karon init gihapon nga topic o hisgotanan kong obligasyon ba sa mga anak ang ilang mga ginikanan ug nasamotan sa nahitabo sa pamilya ni Olympics Gold Medalist Carlos Yulo. Bisan kaniadto pa mao na gyud kini ang isyu sa sulod mismo sa pamilya.

Sa social media karon nabahin ang grupo nga naay team anak ug team nanay nga nagsige og linabtikay niining isyuha.

Matud niining mga anak defenders nga dili obligasyon sa anak ang mga ginikanan kay wala man kuno pangayoa nila nga ipanganak sa kalibotan kay bunga ra man sila kalipay nga natagamtanan. Pagtampalasan anaka kong ingon niini ang mindset.

Sa team nanay mobarug man pud nga ang tanan nga anaa sa anak gikan sa ginikanan kinsa gisakripisyo ang kinabuhi aron lang mahimugso ang anaa sa iyang sabakan.

Busa bisan kapila pa tagodtagoron ang kinabuhi sa anak dili gyud kini makabayad sa binuhat nga naghatag og kinabuhi ug sa tanan  nga gikinahanglan.

O tinuod dili obligasyon sa anak ang mga ginikanan ug labaw na nga dili angayan isipon sa anak nga aduna siyay utang kabubot-on sa iyang mga ginikanan maong mapugos kini sa pag atiman sa mga ginikanan.

Una, dili obligasyon sa anak ang giniknanan kay bug-at kini kaayo kong gamiton nga rason, inay gihimo sa mga anak ang pag-atiman sa mga ginikanan nga pinasubay sa gugma ug dili tungod kay gikinahanglan nga tumanon ang obligasyon.

Atimanon ug panggaon ang mga ginikanan kay gihigugma nato sila. Kong mao kini ang ipatigbabaw sa mga anak gaan kaayo sa paminaw. Kadtong mga anak nga nakaluagluag mohatag sila dili tungod kay napugos sa pagtuman sa obligsyon kon dili hinukad sa kasingkasing.

Sa mga ginikanan usab, sabton pud ang sitwasyon sa mga anak dili sa ingon nga sila ang nag-utong o naghatag og kinabuhi pugson gyud ang anak ug pakaulawan pa kong dili mohatag sa gusto niini. Kong dunay dautang anak naa say ngil-ad og batasan nga mga ginikanan.

Tinuod dili obligasyon sa anak ang ginikanan apan atong responsibilidad nga hatagan og bili ang usag usa tungod kay pareho ra kitang tawo nga mga nilalang sa Ginoo.