Mike gipiangan, Raymond tulin makadagan

Adunay pagya-kanta: “Too much love can kill you.” Ug mao kini ang nahitabo ni kanhi Cebu City Mayor Michael ‘Mike’ Rama, kinsa gihukman sa Office of the Ombudsman nga sad-an sa kasong nepotism ug grave misconduct, lig-ong basehan aron siya i-dismiss sa pagka-mayor.

Unsaon, duroha ka igsuon sa iyang asawa ang gipatrabaho niya sa City Hall isip casual workers. Diin bisan unsaon pa niya sa pagpamahayag, dili na kini makatuis sa desisyon sa Ombudsman. Hinuon, mahimo pa niya kining idangop ngadto sa Court of Appeals (CA) aron pag-secure og Temporary Restraining Order (TRO).

Samot, nga hingpit na siyng gipulihan ni Bise Mayor Raymond Alvin Garcia kinsa gikan sa pagka-acting mayor gihimo na gyong full-fledged mayor human papanumpaa ni Department of Interior and Local Government (DILG)-Central Visayas, Regional Director Leocaldo Trovela sa miaging Oktubre 9, 2024.

Ang nakanindot ni Mayor Raymond, kay bisan siya nay mayor sa dakbayan sa Sugbo, mipakita gihapog kinasingkasing nga simpatiya ngadto ni kanhi Mayor Mike, kinsa daw gibalian og mga pako sa Ombudsman. Diin, igo na lang intawong mokapakapa diha sa iyang dakong tinguha nga magpa-reelect ning umaabot piniliay aron makabalik sa City Hall.

Daghan baya gihapog supporters si Mike. Ang nakaporke, kay dili siya mahal sa administrasiyong Marcos, kinsa gituohang maoy usa sa mga dagkong rason nganong ingon niini kapintas ang matang sa gumonhap nga miabot sa iyang political career. Gani, si Rep. Edu Rama, kinsa magpapili pag-usab, wala na mopasilong sa iyang landing.

Ikaduha, pakyas si Mike sa iyang programang Singapore-Cebu like nga ginadamgo. Kay imbes kalimpyo ang atong makita sa tibuok palibot, may mihimo man gihapon sa atong kasapaan-kasubaan og labayanan sa basura ug mga biyang hugaw sa tawo ug mananap. Usab, nganong mosundog-mangopya man kita sa uban? Nganong dili man kita mokulit sa kasaysayan og kaugalingon natong pangalan? Hinungdan, nakahukom si Mayor Raymond nga dili na kini niya ipadayon.

Ug gumikan niining mga panghitabo ug kausaban, makita ang iyaiyang bayhon sa kanhi mayor ug karon mayor sa Cebu City, diha sa ilang panagharang aron magpapili sa pagka-mayor. Si Mike modagan nga gipiangan samtang si Raymond tulin nga makadagan.

May makapugong pa kaha ni Raymond?