Dili kaayo banga

Ang pagduso ni Pastor Apollo Quiboly sa iyang COC nakaani og daghang pagsaway sa social media diin gipadayag sa mga netizen ang ilang kadismaya ug kasuko sa pastor ingon man sa sistema sa eleksiyon nga nagtugot gihapon sa kandidato pagdagan bisan sa nagpatong-patong nga kaso nga giatubang.  Kon dili amendahan ang balaod sa piniliay, padayon makalansad ang mga dangan sa katilingban.  Mao kana’y giingon nga, “Ang atong sistema sa eleksiyon, igo lang naghatag kanato’g kahigayonan sa pagpili sa kandidato nga dili kaayo bangâ kon itandi sa uban.”  Muleeng!

Mao’y manghugas sa plato

Namahayag si Presidente Marcos nga labaw pa sa kasagmuyo ang iyang gibati ngadto sa China tungod sa managlahi niini’ng pamahayag kabahin sa mga kalihokan niini diha sa South China diin sukwahi kaayo ang ilang gisulti sa mga panagtigum kon itandi sa ilang gibuhat didto sa kadagatan.  Bisan ni’ng pamahayag sa presidente, ug luyo sa padayon nga agresyon sa China sa  maong lugar,  wala’y tataw nga reaksyon ang mga silingan nga nasud nga kaalyado sa Pilipinas.  Makapahinumdum sa tawo nga wala maminyo nga nagmahay sa pag-ingon, “Paeet ni’ng mag-inusara ka; ikaw ra’ng usa magkaon nya ikaw ra pud ang manghugas sa plato."  Fezteleern!

Lain’g gamit sa Langaw

Naglaraw ang Cebu City Solid Waste Management Board (SWMB) nga i-promote ang black soldier fly (BSF) isip usa ka paagi pagpamenos sa basura ginamit ang composting ingon man pagtabang sa pagdugang sa abot sa mga mag-uuma pinaagi sa pag-gamit sa mga ulod sa black soldier fly sa pag-decompose sa mga organic waste aron pag-convert niini isip organic fertilizer.  Bag-o pa ang maong teknolohiya dinhi sa Sugbo busa posible nga adunay pagsupak nga masinati kon kini pagasagupon.  Apan dili lang pud isalikway kining maong programa kay ginaingon man bitaw nga, “Ang panahon masadya, kon adunay mga langaw (Time is fun when you’re having flies).  Aaw, yuna pa, mora’g nabali man! Fishkots!

Labaw’ng Tawhanon

Gibutyag sa drug lord nga si Rolan “Kerwin” Esponosa nga ang kanhi hepe sa PNP ug karon senador nga si Ronald "Bato" dela Rosa mihulga kaniya mao nga napugos siya pag-hingalan ni kanhi senador Leila de Lima nga usa ka “drug protector.” Gipanghimakak sa senador ang pamahayag ni Kerwin dungan ang pag-ingon nga nagpaka-limpyo ang naulahi.  Haum ni’ng kahimtanga ang panultihon nga, “Ang pagpakasala, tawhanon, apan ang basolon ang uban sa imong sala, labaw pa’ng tawhanon.”  Madahaan!

Nahisama sa Omang

Buot imbestigahan sa konseho sa dakbayan sa Sugbo ang giingon nga paglakip sa mga dili kwalipikado’ng benepisyaryo ug mga professionals sa socialized housing program sa dakbayan.  nga alang lang unta sa mga kabos.  Subo tinuod palandungon kining pagpahimulos sa mga giingo’'g professionals. Matud pa sa akong amigo, “May’pa ang mga kaka (spider) kay maantigo pa mohimo sa ilang balay.  Kining mga professionals nahisama lang hinoon sa Omang (hermit crab) nga magpataka lang og sul-ob og mga bagal o bisan unsa’ng bakante nga sudlanan aron himoong balay-balay.” Pagkatoytoy!

Team sa mga pildero

Usa ka grupo sa oposisyon nga nagtawag sa ilang kaugalingon og "Team Liberate Cebu" ang nahimugso niadtong Huwebes atol sa usa ka tigom nga gipatawag sa gitangtang nga mayor sa dakbayan sa Sugbo nga si Michael Rama.

Isip opisyal sa Partido Demokratiko Pilipino (PDP), gitigom ni Rama ang nahabilin nilang mga membro aron mugnaon ang "Team Liberate Cebu."

Ug nakatag-an mo, pulos pildero ang mga nanambong sa tigom nga gitumong aron kuno ituboy ang ilang kandidato pagkagobernador, Pamela Baricuatro, batok sa incumbent nga si Gobernador Gwen Garcia.

Unsaon pagkadaog sa kandidato kun pulos pildero ang moindorso?

Ang kataw-anan sa ilang kawsa mao nga haw-ason kuno sa ilang grupo ang Sugbo gikan sa kagutom ug kakabos.

Ambot wa ba malipong si Rama ug ambot nahibawo ba siya nga ang Sugbo maoy numero unong probinsiya sa nasud ug labing dato nga lalawigan.

Kun maghisgot ta og kagutom ug kakabos, mas daghan ang ania sa dakbayan sa Sugbo ang gipanggutom ug nag-antos sa grabeng kakabos nga wala niya mahaw-as dihang wala pa siya gi-dismiss sa Ombudsman.

Kataw-anan nga ang usa ka kanhi opisyal nga wala gani makasalbar sa iyang kaugalingon gikan sa pagkataktak sa serbisyo mangambisyong mahimong super hero aron kuno haw-ason ang probinsiya.

Kun akoy Rama mas maayong tutokan una niya unsaon nga maluwas siya sa iyang kaso aron makapapili siya pagbalik.

Ug kun molampos na siya paghawan sa mga babag sa iyang agianan mas maayong makig-atbang siya mismo ni Garcia pagkagobernador inay manggamit og laing tawo aron makita ang katag.