EDITORYAL - Laing POGO sa Moalboal?

Laing gidudahang Philippine Offshore Gaming Operations na sab ang nadiskubrehan sa us aka resort sa lungsod sa Moalboal ug dunay 38 ka mga Chinese nationals nga nasakpan sa sud niini.

Samtang kapolisan wala pa gyud makasiguro kun POGO ba gyud kini, apan nakwestyon ng daan ang pagkatawo sa mga Chinese nationals didto tungod kay matud pa wala makapresentar dayun og ilang mga dokumento.

Gawas pa niana, dunay 34 ka mga computers, 200 ka mga cellphones nga nakuha diha sa maong resort. Mga timailhang duna gyuy dili ordinaryong operasyon sa maong dapit.

Hinuon ukayonon pa sa mga otoridad ang unod aning mga computers ug cellphones aron pagsuta kun gigamit ba kini sa online gaming ug online scamming.

Tungod sa ilang aplikasyon og high speed internet connection, nakabantay ang lokal nga kagamhanan nga dili kini basta-basta lang mga bakasyonista ang mga langyaw.

Kung buot gyud hunahunaon, dali ra gyud mabantayan kining mga ingon niini nga operasyon kun ang tanan magmabinantayon ug magpakabana lang.

Kun makakita gani og talagsaong gidaghanon sa mga langyaw sa usa ka lugar, nag-abang ba o nagpuyo, kinahanglang magduda na dayon.

Sa mga tagiya palang aning mga resorts o mga edipisyo nga nagpaabang, kinahanglan gyud unta silang mosukit-sukit una sa mga moabang kun unsay gamitan sa ilang propiyedad.

Ug dili basta tuohan o dawaton ang pasumangil, kinahanglan untang magpakabana ang mismong mga tagiya pinaagi sa pagpaniid sa mga nag-abang ug mopahibalo dayon ngadto sa mga otoridad.

Ug tungod kay kinahanglan man gyud og paspas nga internet ang operasyon sa POGO, maayo tingaling mandoan sa mga LGUs o ba kaha mopasar og ordinansa nga kinahanglang mo-report ang mga telcos ngadto nila kun dunay mga nagpataud og internet nga dili normal sa naandang ipataud sa mga konsumidor.

Kanunayon sab og personal nga inpeksyonon sa mga nagkalain-laing ahensiya sa gobiyerno kining mga paabangan, resorts, condominiums ug uban pa aron masigurong walay naghimo og binuang .

Sa laktod, kinahanglang mokooperar ug magpakabana ang tanang sektor sa katilingban kun gusto niining mapahunong kining POGO dinhi sa nasud.