Pagka hayahay

Dili sayon ang pag-apil sa eleksiyon kay makagasto ka man gyud og dakong kantidad, ug dili pa gihapon sigurado nga makadaog.

Apan dinhi sa probinsiya sa Sugbo, daghan kaayong kandidato pagka kongresista, mayor, bise mayor, ug kandidato pagka Provincial Board members nga way mikontra.

Sigurado na ang ilang kadaugan kay bisan og dunay usa nga mobotar kanila, daug na man! Pagka swerte sa akong amiga nga reporter niadto kay sigurado na nga kongresista.

Ang kauban sab nako nga reporter sa Bombo Radyo kaniadto ug karon mayor sa Tudela, Camotes way miatbang kay pinangga kaayo sa mga botante si Mayor Jojo Solante.

Kining maong mga kandidato makatulog ra gyud nga maghayang, dili sama sa uban nga pirmi lang pangulbaan nga maghunahuna nga basin way mosuporta kanila.

* * *

Padayon nga giatiman sa administrasyon karon ni Mayor Raymond Alvin Garcia ang pagsulbad sa kanunay’ng paglunop sa downtown area sa siyudad sa Sugbo.

Kaniadtong Huwebes sa buntag, gihimo ang ceremonial nga pagguba sa kural sa Cebu Ports Authority (CPA) didto sa Pier 2, aron nga makaagi ang mga heavy equipment nga gamiton sa pagpalawom sa entrada sa Estero de Parian.

Gawas nga mapalawman ang maong bahin sa sapa nga gawasanan sa tubig gikan sa Estero de Parian, sayon na lang ang pagtangtang sa pipila ka haligi sa pantalan nga aron dili makaali sa pag-agos sa tubig.

Matud ni Mayor Garcia nga basta maayo ang relasyon sa kagamhanan sa siyudad ngadto sa CPA, dali ra gyud ang paghimo og sabot-sabot aron pagsulbad sa problema.

Bitaw, kining problema nga kanunay’ng maglunop ang downtown area kon mag-uwan kay moawas ang Parian Creek nga anaa magsubay sa downtown area, angay gyud nga kahatagan og sulbad.

Pwerteng daghana na nga mga mayor nga nangagi ug kining maong problema sa paglunop diha sa downtown area wa gyud kahatagi og sulbad.

Kon kahatagan kini og sulbad atol sa administrasyon ni Raymond isip mayor, sigurado nga mopagakpak ang mga tawo kaniya.

Unya, mas nindot gyud nga magmugna unta si Mayor Raymond og team sa mga kawani sa City Hall nga tahasan sa pagpanapak sa mga libaong sa karsada.

Ako na kining gisugyot sa administrasyon ni dismissed Mayor Michael Rama, apan giingnan ko nga naa na man kuno’y gitugyanan niining maong trabaho, apan tan-aw nako wa man maglihok.

Mao nga mas nindot gyud nga patutokan kini ni Mayor Raymond kay kon wa na kaayoy mga libaong ang atong mga karsada, mopahiyom ang katawhan, ang mga motorista, ug sa hilom modayeg kini kaniya.

Pagka karon, sus daghang libaong sa atong mga karsada.