Hustisya sa mga biktima sa Sugbo
Nagplano ang mga sakop sa Quad Committee sa House of Representatives nga tapuson na karong adlawa ang ilang imbestigasyon sa extrajudicial killings (EJKs) sa administrasyon ni kanhi Presidente Rodrigo Duterte. Pero niangkon nga mag-agad sila sa mga testimoniya ug mga ebidensiya sa resource persons.
Gipaabot nga mag-abot na karong buntag, atol sa ika-walo nga public hearing sa quad comm nga motuki sa EJKs sa Sugbo, silang kanhi Cebu City Mayor Tommy Osmeña, kanhi Cebu City Police Office (CCPO) Chief Royina Garma ug kanhi Philippine National Police (PNP) Chief Debold Sinas.
* * *
Patingugon atol sa hearing ang mga paryente sa mga biktima sa EJKs dili lang sa Sugbo ug Central Visayas kon dili hasta na sa Batasan Hills sa Quezon City. Nga apil sa mga lugar nga gigamitan sa “Davao template” nga nasabotan sa mga gradwado sa Philippine National Police Academy Class 1996 ug 1997 dayong asumir ni Duterte sa Malakanyang sa 2016.
Ang EJKs sa Sugbo ug rehiyon ipatubag nilang Garma (PNPA Class 1997) ug Sinas samtang ang sa Batasan Hills ipasabot ni Police Col. Lito Patay (PNPA Class 1996).
* * *
Kanus-a kutob ang imbestigasyon? Niangkon si Kongresista Bienvenido Abante, co-chairperson sa quad comm, nga mahimong maabtan sa sunod tuig tungod sa kadaghan sa mga isyu nga tukion ug resource persons nga ipatawag.
Nagkahulogan nga dugay pang matanggong silang Garma ug ubang gisagpa og contempt sa komitiba. Nagkauyon silang Kongresista Ace Barbers, quad comm lead chairperson, ug Abante nga ang imbestigasyon dili lang para sa pagpasar og mga balaudnon kon dili pagpasaka sab og mga kaso sa mga sad-an.
* * *
Pagsugod sa quad comm, walay nagpaabot nga dunay makahuloganong kasayuran nga mahipos ug mga kasong mapasaka. Gikabalak-an nga salida sa mga kongresista ug lihay-lihay sa resource persons ang mahitabo. Pero naablihan pagbalik ang mga kaso sa patay sa Davao Prison ug Penal Farm sa 2016 ug sa Philippine Charity Sweepstakes Office (PCSO) sa 2020.
Ug karong adlawa hinaut nga mas matutokan ug kahatagan og hustisya ang mga biktima sa laktod nga pinatyanay ug duguon nga mga pagpanghasi nga nahitabo sa atong kaugalingong nataran niadtong 2018 ug 2019 nga gipasangil nga gipangulohan nilang Garma ug Sinas.
* * *
- Latest
