Nagpahilit na ang operasyon sa POGO

Gikan sa mga highly urbanized cities sa nasud, nagpasuok na usab karon sa probinsiya ang operasyon sa Philippine Offshore Gaming Operators kon POGO sama sa nadiskobrehan sa sitio Kalingking, Barangay Saavedra lungsod sa Moalboad sa lalawigan sa Sugbo diin adunay 38 ka mga langyaw o mga Chinese nationals ang gikustodiya sa pagkakaron sa kapolisan kinsa gitoohan nga nalambigit sa illegal nga kalihokan.

Nasakpan sila sulod sa usa ka beach resort sa lungsod dihang nagpahigayon og routine inspection ang lokal nga kagamhanan sa naasoy’ng lungsod ug nasuta nga undocumented ang mga langyaw sanglit wala may passport nga ilang napakita sa mga otoridad

Dili ra ba makabalo kuno mag-Ininglis kining mga langyawa ug samot nga dili sila makabalo mag Binisiya. Hinapos sa Septiyembre sila nag-abang exclusive sa naasoy’ng beach resort ug nasayran nga wala kuno ni sila tugoti nga makagawas gawas gikan sa resort nga giestahan.

Atol sa operasyon sa mga pulis, nakuha ang mokapin sa 200 ka mga cellphones ug mga computers nga nakapasamot sa pagduda sa kapolisan nga nalambigit sila sa illegal nga kalihokan ilabi na sa POGO kay susama man sa pattern sa ubang mga dapit diin duna usay nabungkag nga susamang illegal activity.

Kining mga nadakpan sa mga otoridad dako ang posibilidad nga mao kining mga langyaw nga nakasibat sa POGO sa Pampanga ug sa Agus dakbayan sa Lapu-Lapu ug nibalhin na usab sila sa ilang operasyon diin niining tungora didto na sa probinsiya kanang lisod masakpan sa mga tawo kong unsay ilang gibuhat nga tinonto.

Nagtuo seguro sila nga makalusot ug tuloy ang ligaya tungod kay anaa naman sila sa probinsiya nga lisod matultolan kay maalaan man sila nga mga turista, unya ang lungsod sa Moalboal usa man kini sa tourist attractions sa Sugbo, sama sa dakbayan sa Lapu-Lapu nga daghan na kaayong mga langyaw nga nagpuyo.

Apan duna man gyuy kinutoban ang tanan ilabi na karon nga halos tanan mga marites na ug madudahon kaayo sa mga tawo nga anaa sa ilang palibot. Hinuon makatabang baya usab kining mga marites sa pagpangita niining mga wanted sa balaod.

Pangagpas lang nako nga ang kadtong anaa sa probinsiya ginagmay lang kadto sanglit hangtud karon anaa pa gihapon ang operasyon sa sentrong bahin sa mga dagkong syudad diin posibleng naa ra sila sa mga pribadong building o mga condominium ug dili sila matarog sa mga tinugyanan sa balaod kong walay search warrant ug dili kini masayon sayon sa pagkuha sa korte sa atong mga law enforcers. Subay niini, giklaro ni cebu City Mayor Raymond Alvin Garcia nga dili gyud  niya i-discount ang posibilidad nga anaa kini sa dakbayan sa dakbayan. Safe ra kini mga pamahayag kay ugaling tinuod aw manglipaghong gyud siya sa kauwaw nga nagdeklarar nga pogo free ang Cebu City.

Sa mga LGU uban ang mga sakop sa PNP ug NBI apil na ang katilingban kinahanglan nga maghiusa aron hingpit na kining POGO mawagtang. Sa mga anaa sa likod niining pogo, ayaw nalang na ninyo ipadayon kay segurado maabot gihapon kamo sa balaod nga maoy mosilot kaninyo.