Badlungon nga mga polis
Kahinumdom ka ni Police Colonel Engelbert Soriano Kadtong hepe sa Cebu Provincial Police Office nga nagpabilin lapas sa iyang termino kay giisip nga paborito sa gamhanang politiko sa Sugbo. Kadto bitaw’ng giibot na lang gyod niadtong 2022 kay gawas nga overstaying nakalimot sa iyang siyensiya ug nisuporta sa binuang nga lagda nga wala na kinahanglana nga magsul-ob og facemasks bisan seryuso pang hulga sa tinakdanay sa Covid-19.
Sakop siya sa Philippine National Police Academy (PNPA) Class 1996 kansang pipila ka sakop giimbestigar sa kamatayon ni Police General Wesley Barayuga.
* * *
Kahinumdom ka ni Police Colonel Hector Grijaldo Jr. Kadtong hepe sa Cebu City Police Office (CCPO) nga usa ka buwan rang naghupot sa puwesto? Kadto bitaw’ng nipuli ni Police Colonel Engelbert Soriano niadtong 2020? Kadto bang girelibohan human nasakpan sa CCTV nga nangulata og polis.
Sakop siya sa PNPA Class 1996. Usa siya sa gidudahan nga apil sa cover-up sa imbestigasyon sa kamatayon ni Barayuga nga gipasangil sa iyang classmate nga si National Police Commissioner Edilberto Leonardo ug sa sakop sa PNPA Class 1997 nga si Koronel Royina Garma.
* * *
Kahinumdom ka ni Police Colonel Rommel Javier Ochave Kadto bitaw’ng natudlo nga hepe sa CPPO niadtong 2022 pila ka buwan human narelibohan si Police Colonel Engelberto Soriano.
Sakop sab siya sa PNPA Class 1996. Apil siya sa gipasanginlan ni Kongresista Romeo Acop sa House Quad Committee nga sakop sa Kingsmen sa kapolisan uban sa iyang classmate nga si Leonardo. Gitumbok sab si Ochave nga maoy nagkontrolar sa small town lottery (STL) sa Sugbo.
* * *
Gawas nilang Garma, Soriano, Grijaldo ug Ochave, ambot kinsa pay ubang mga sakop sa PNPA Class 1996 ug 1997 nga nadestino sa Sugbo. Pero daghang katuigan sa wala pa sila makatunob sa Sugbo, duna silay classmate nga nagpabadlong na dinhi sa ato.
Niadtong 2002, si kanhi CCPO Chief Lani-o Nerez nipasangil sa sakop sa PNPA Class 1996 maoy nangulo sa sunudsunod nga mga tulis sa Sugbo. Ang wala ilha nga opisyal, nga dugay nang absent without leave (AWOL), giingon ni Nerez nga nagnegosyo og shabu ug nanghambog sa kasayon ra niyang nakakompra og suplay gikan sa Barangay Duljo-Fatima.
* * *
- Latest
