Ang mga kandidato

Karong adlawa ang kataposang adlaw sa pagduso sa certificate of candidacy sa mga magpapili sa Mayo 12 nga bugnong lugaynon. Busa atong gipaabot nga modagsa sa buhatan sa Commission on Elections (Comelec) ang mga mokandidato nga wala pa makaduso sa ilang mga COC.

Wala pa nato masayri kun pila gyod ang tanang kandidato nga magtigi sa 18,280 ka mga posisyon lukop nasud nga gilangkoban sa 12 ka mga senador, 63 ka mga Party-list, 254 ka mga kongresista, 82 ka mga gobernador, 82 ka mga bise gobernador, 800 ka mga Provincial Board members, 149 ka mga city mayors, 149 ka mga city vice mayors, 1,690 ka mga city councilors, 1,493 ka mga municipal mayors, 1,493 ka mga municipal vice mayors, 11,948 ka mga municipal councilors, 25 ka mga sakop sa BARMM Parliament ug 40 ka mga BARMM Representatives.

Sigon sa nakita nato sa talaan sa Comelec nagkalainlain lang miduso sa ilang mga COC. Adunay mga heneral kaniadto ug opisyal sa militar ug kapolisan, mga artista, personalidad sa radyo ug television, negostante, rapper, vlogger, vendor, call center agent ug daghan pa.

Kun kaniadto ini’g kahuman sa termino sa bana, ang asawa ang mopuli ug kun dili ang anak o igsuon. Karon nagdungan na gyod sa pagpapili ang amahan, inahan, anak ug mga igsoon sa mga Tulfo nga sila si Erwin ug Ben. Ang lain nilang igsuon nga si Raffy Tulfo naglingkod nang senador. Kay kataposan na sa iyang termino sa Senado, gustong papolihon ni Senador Cynthia Villar ang iyang anak nga si Camille. Naglingkod napod daan sa Senado ang iyang laing anak nga Mark Villar.

Si kanhi Presidente Rodrigo Roa Duterte magpapili pod pagka mayòr sa Davao City ug bise mayor ang iyang anak nga si Baste nga mayor karon sa Davao. Magpapili pag usab pagka kongresista ang laing anak nga si Polong ug bise presidente karon sa Pilipinas ang igsoon niini nga si Sara Duterte Carpio. Kini ug daghan pa sila nga mga pamilya.

Hinuon, inyo ra man pod seguro silang pilion. Kun mao man gani, na hala, Mabuhi ang Pilipinas.