EDITORYAL — Duterte, Robredo pagka mayor?

Ubay-ubay nga dagkong pangalan sa politika sa nasud sa nakalabay nga mga eleksyon ang mipili nga sa mas ubos nga posisyon mokandidato sa umaabot nga piniliay karong Mayo 2025.

Samtang adunay mga bag-o nga wala pa sukad sa kinabuhi bisan nahimo lang barangay kagawad nga midagan pagka-senador sa nasud.

Aduna say mga ilado na nga mga nikandidato nga duna nay mga pangalan bisan dili pa sila mga politiko kaniadto sama sa mga brodkaster, artista ug mga abogado nga gusto sab mosuway sa Senado.

Sa mga inilang pangalan nga mas gipili ang modagan sa lokal nga bugnong lugaynon mao sila naglakip nilang kanhi presidente Rodrigo Duterte, kanhi bise presidente Leni Robredo.

Si Duterte mipahibalo nga mobalik siya pagdagan pagka-mayor sa Davao City ug iyang ka-tandem ang anak nga si Baste isip bise mayor.

Husto ang desisyon ni Duterte nga dili na modagan og national position tungod sa iyang pangidaron, bisan unsa pay pagtuboy buhaton sa iyang mga supporters, ang lawas sa tawo ini og magkaedad mohinay gyud.

Pipila ka buwan na ang milabay sa dihang nikatap ang estoryang modagan siya ug iyang mga anak nga silang Polong ug Baste pagka-senador sa 2025 elections.

Hinuon, bisan aduna nay pamahayag si Duterte, duna pay nahibiling duha ka adlaw gikan karon hangtud ugma, Oktobre 8, aron usbon niya ang iyang gipanulti.

Pwede kaayo nga pagka-senador gyud ilang daganan, sama sa gibuhat niya niadtong 2016 nga eleksyon nga gipaigot og maayo ayha pa nidesider sa pagdagan.

Samtang si kanhi bise presidente Robredo, daghan ang nagtuong modagan siya og pagka-senador, apan mas gipili niyang modagan pagka-mayor sa Naga City. Matud pa niya, ganahan siyang sa ubos sama mga komunidad motrabaho ug moserbisyo.

Samtang si kanhi senador Leila de Lima gipili nga sa Ubos Balaybalauranan midagan ubos sa Mamayang Liberal Party-list.

Matud pa niya, init kaayo sa Senado, dako unta siya og plano sa dihang napili siya kaniadto pagka-senador apan gipapriso siya tungod sa iyang dayag nga kritisismo sa administrasyong Duterte.

Samtang ang ilado nga managsuong Tulfo, nga silang Ben “Bitag” Tulfo ug Erwin Tulfo misang-at sab og kandidatora pagka-senador. Ang duha gustong mosunod sa yatak sa ilang igsuong si Senador Raffy Tulfo.