Lipatlipat-dula sa politika

Sa miaging September 26, 2024 opisyal nga giinderso ni Presidente Bongbong Marcos Jr. (PBBM) ang 12 ka kandidato pagka-senador sa iyang administrasiyon alang sa umaabot 2025 mid-term election.

Ania kining mga mosunod: Benhur Abalos, Pia Cayetano, Lito Lapid, Manny Pacquiao, Tito Sotto, Erwin Tulfo, Camille Villar, Francis Tolentino, Bong Revilla, Imee Marcos, Ping Lacson ug Abby Binay.

Si PBBM mismo ang malipayong miisa sa ilang mga kamot didto sa hamugawayng entablado sa Philippine International Convention Center (PICC), Pasay City. Gikan sa nagkalainlaing partido ang nahisgotang mga kandidato nga gihiusa ni PBBM ubos sa iyang koponan nga gitawag niyag ‘Alyansa Para sa Bagong Pilipinas.’

Panahon sa eleksiyon, kuwarta maoy pinakagamhanan. Ug sanglit ang administrasiyon man maoy adunay kinadaghanan-kinaabundahan, daghang prinsipyo ang nangabawog.

Ang kanhi mikontra pag-ayo sa mga Marcos, karon kaalyado na.

Daghan ang nakurat. Human ibandilyo ni PBBM ang iyang 12 ka senatorial candidates, wala abtig dugay, mibulag ang duroha niini: kanhi Senador Ping ug karon Senadora Imee kay sila mag-Independent na lang.

Miani kinig nagkalainlaing reaksiyon. May mikomentariyo nga basig nahadlok sila sa mga Diehard Duterte Supporters (DDS), kinsa magsige'g bahad-post sa social media nga kutob sa mokandidato ubos sa administrasiyong Marcos, tanan dili nila botaran.

Usab, may miingon nga gimik o drama ra kini nila ni Imee, kinsa hagbay ra man tuod mipakita nga gisaway niya ang mga hiwing binuhatan sa iyang igsuon, pero wala gyoy aksiyon diha sa Senado nga paimbestigahan si PBBM. Kini tungod kay ‘blood is thicker than water.’

Aniay akong kaugalingong basa niining pagpalayo nila ni Imee ug Ping sa senatorial line-ups ni PBBM. Kini aron pagpatuo sa katawhan nga anti-Marcos kunohay sila.

Buwahan, botaran sab sila sa mga taga DDS. Apan ang tinuod, suportahan gihapon sila sa mga dumadapig ni PBBM. Sa ato pa, nakahatag kini kanilag dugang dakong pabor.

Ang pait lang, kay sa higayon nga sila modaog ug makalingkod na sa Senado, otomatik pro-Marcos gihapon sila. Hinuon, pangagpas ra ning akoa, ha? Purely, opinion lamang.

Ingon niini ang politika sa Pilipinas. Puno sa gimik, dula ug lipatlipat. Busa, ikaw botante, intawon ayaw gyod palipat-ilad!

Kay ang kaugmaon sa atong nasod magsugod sa kaugalingon mong paghukom!