Nagpabutabungol lang

Nadismaya ang tigpamaba sa Philippine Coast Guard (PCG) nga si Commodore Jay Tarriela, sa daw pagpaka-buta-bungol sa mga silingan’g nasud sa Southeast Asia bisan sa dayag nga hostile nga kinaiya nga gipakita sa mga pwersa’ng Chinese sa West Philippine Sea. Apan mismo ang Pilipinas wala man usa’y tataw nga pag-alkontra sa mga abuso sa China sa West Philippine Sea.  Makapahinumdum sa usa ka hubog nga nagsinggit-singgit pag-ingon nga, “Kinsay isog ninyo diha, dali diri aron magtigi ta?”  Sa dihang may mitubag nga siya isog usab, kalit nga milumoy ang hubog ug hilaw nga mipahiyom dayon ingon nga, “Aaw, duha na ‘tang isog.”  Atalaa lagee!

“Five-six” scheme

Mipalabang og resolusyon si Cebu City Councilor Pastor “Jun” Alcover nga nag-awhag sa Cebu City Legal Office nga lantawon ang mga posible’ng legal ug ubang legislative interventions kabahin sa “five-six” usurious loan interest nga giimponer ngadto sa mga ambulant vendors ubos sa mga langyaw’ng money lenders.  Luyo sa pagpakabana ni Konsehal Alcover sa mga ambulant vendors, daghan usab ang nadungog nato’ng estorya kabahin sa mga dili maayo mobayad nga mga utangan.  Makapahinumdum sa panahom sa usa ka lender nga nagkanayon, “Sa pag-release nako ug pagdawat nila sa loan, gihiktan ang ilang iro; karong naningil na ko, gibuhian na ilang iro.”  Fezteleern!

Wakwak batok politiko

Misaad si Senate President Francis “Chiz” Escudero nga dili niya babagan ang bisan unsang balaodnon nga ipasaka batok sa political dynasties bisan maingon nga produkto siya niini.  Miangkon hinuon si Escudero nga gamay lang ang kahigayonan nga mopasar ang maong balaodnon sa Kongreso.  Tungod kay wala may tataw nga balaod batok sa political dynasty, gihimo na nga daw family business sa uban ang politika. Matud pa nila, “Mas maayo pa ang may kaliwat nga ungo/wakwak kay posible pa’ng maputol ang ilang linyada kon dili mapasa ang dagon ngadto sa anak.  Pero ang mga politiko, magapadayon hangtud sa pila ka kaliwatan basta lang adunay eleksyon nga ipahigayon.”  Muleeng!

Just for the fund of it

Namahayag ang COMELEC nga walay mahikawan sa iyang katungod sa pagpili sa bisan unsang posisyon sa 2025 election gumikan lang sa iyang kakabos.  Giluwatan sa COMELEC ang maong pamahayag bisan sa gilatid sa gilatid sa COMELEC Rules of Procedure Part V, Rule 24 nga ang bisan kinsang kandidato nga wala gayo’y tinud-anay nga intension pagdagan ug magbutang na lang hinoon sa election processes sa kaulawan, mahimo ideklarar nga nuisance candidate. Angay istriktohon pagpatuman sa COMELEC ang maong reglamento.  Kay matud pa sa akong amigo, “Naay modagan nga makwartahan panahon sa eleksyon, apan anaa sa’y modagan aron maka-kwarta.  Sila kadtong mikandidato “Just for the Fund of it.”  Madahaan!

 May’pa matay

Atol sa pagsaulog sa National Teachers’ Day, gimandoan ni Presidente Bongbong Marcos ang kalihim sa edukasyon nga si Sonny Angara nga atimanon sa mga magtutudlo sa mga publikong tulonghaan ug hataga’g igong pagtagad ang ilang kaayohan.   Sa kahimtang karon sa katawhan sa Pilipinas, maingon nato nga dili lang mga maestra ang angay’ng atimanon kon dili ang tanan’g sektor sa katilingban.  Kon dili angayon ang pag-atiman, basin makakanta og ahat ang mga napasagdan ginamit ang komedya nga kanta nga nagkanayon, “May’pa matay, bungi, buktot, mga putot; may’pa matay.”  Pagkatoytoy!