Demalas gyud

Daghan kaayo og mga abogado ang Cebu City Hall, apan wa man sila makatambag ni Mayor Michael Rama nga sayop ang pagpatrabaho niya isip mga casual employees sa duha ka igsuon sa iyang asawa.

Ang ilang argumento mao nga sila si Gomer ug Elmer Mandanat, nga mga igsuon ni Malou Mandanat nga asawa ni Rama, dugay na nga nagtrabaho sa Cebu City government nga dili pa gani mayor si Rama, ug wa pa sila maminyo si Malou.

Apan ang kadagkoan sa Ombudsman mihatag og katin-awan nga bisan pa sa maong argumento sa mga abogado ni Rama, dili gihapon kini madawat nga rason.

Ang tukma unta nga gihimo nila ni Rama mao nga dihang nakasal na sila si Malou, gihimo na lang niya nga co-terminous sila si Gomer ug Elmer.

Nagtuo ang mga imbestigador sa Ombudsman nga kay abogado man si Rama, nasayod gyud siya sa balaod ug kay iya man kini nga gihimo, maisip kini nga usa ka pagpangabuso.

Dili sayon kining problema nga giatubang ni Rama kay nagtinguha ra ba siya nga makabalik pagka mayor, ug gani mi-file na siya sa iyang Certificate of Candidacy kaniadtong Huwebes didto sa opisina sa Comelec.

Aw, sigurado hinuon ko nga mo-file gyud og Motion for Reconsideration si Rama ug hangyoon ang Ombudsman nga hinuktokan usab ang iyang rason.

Para sa mga abogado ni Rama, dili usab makiangayon nga ang mga igsuon ni Malou nga asawa sa mayor taktakon na lang sa trabaho abi kay ang ilang isguon naminyo ni Rama.

Dili man tingali taktakon sa trabaho, kondili, usbon lang ang status nila, gikan sa pagka casual employees ngadto na sa pagka co-terminous nga kon wa na si Rama, matangtang usab sila sa trabaho.

Pareho gyud sila si Rama ug si Mandaue City Mayor Jonas Cortes nga gisilotan sab sa Ombudsman og dismissal sa pagka mayor kay giingong nagpabaya sa katungdanan.

Gireklamo sab si Jonas sa duha ka lumolupyo sa Barangay Labogon, Mandaue kay gitugotan ra ni Jonas ang usa ka cement batching plant nga maka-operate sa ilang lugar bisan og way kompletong permit.

Pero matud ni Jonas nga gigukod gyud siya sa iyang mga kontra, ug kaatbang sa politika, ug gipangitaan gyud og sayop aron paghawan sa ilang dalan paingon sa City Hall.

Akong tambag sa mga opisyal sa kagamhanan nga magmatngon gyud mo sa inyong mga lihok kay daghang mga mata nga nagtutok ninyo, ilabi na ang inyong mga kaatbang sa politika.

Unya, ayaw kaayo mo pagsalig sa inyong mga tawo nga gibutang sa mga pwesto sa kagamhanan. Kon makasala sila, ayaw kahadlok nga ilisan ninyo sila sa katungdanan.