Paukyab

Sugod karong adlawa, kadtong gustong magpapili sa mga elective positions sa kagamhanan alang sa eleksyon sunod tuig makahimo na pag-file sa ilang certificates of candidacy.

Sigurado ko nga dunay ubang kandidato nga mosayo gyud sa pag-file sa ilang mga COC, kay mahimo man kini nga propaganda nila kay mabalita man gyud sa media.

Ang uban nga kandidato mohimo og mga paukyab, sama sa pagdala og banda ug daghang supporters sa pag-adto nila sa opisina sa Comelec.

Pero sagad gyud sa mga kandidato nga alyado og mga iladong partido, adto na gyud mo-file sa ilang COC usa ka adlaw sa dili pa ang deadline karong Oktubre 8.

Timan-i ninyo nga walo ra ka adlaw ang pagpanawat sa mga COC sa Comelec. Layo pa kaayo ang eleksiyon kay unya pa kini sa Mayo 12, sunod tuig ipahigayon.

Ambot og unsa kaha’y pamaagi sa Comelec, kon tugutan ba kaha nila ang mga kandidato nga makapangampanya bisan wa pa ang official campaign period.

Kaniadto gud ang Comelec miingon human maka-file og COC ang mga nangambisyon nga mohupot og pwesto sa kagamhanan, dili na sila katugotan nga makahimo og “premature campaign.”

Pwerteng daghana na ra ba nga dagkong billboards nga anaa ang dagway sa mga mokandidato, ingon man ang ilang mga ngan?

* * *

Lain pay ato, may mihunghong nako nga mobalik diay pagdagan pagka kongresista sa ikalimang distrito si Nito Durano. Nindot ni kay sila si incumbent Congressman Duke Frasco ang magsangka.

Mora’g makabentaha niining pormaha si Nito kay si Bongbong Marcos karon maoy presidente, ug di siya makalimot nga ang mga Durano sa Danao suod kaayo sa iyang amahan kaniadto.

Nindot man gyud kon suod ka sa presidente, apan bisan pa og ibutang nato nga dili suod ang mga Marcos sa banay’ng Durano, ilado kaayo ug pinangga si Nito diha sa Danao ug ubang lungsod sa 5th congressional district kay daghan man siya'g maayong binuhatan kaniadto.

Abi baya nako og pagka gobernador ug bise gobernador ang daganan ni Nito Durano kay dihay usa ka kalihokan didto sa usa ka lungsod sa probinsya, nga didto siya.

Sa Mandaue City, ambot og tinuod ba nga magpapili lang gihapon pagka kongresista si Lolypop Ouano-Dizon. May mga tabi-tabi man gud nga basin mayor ang daganan ni Lolypop.

Pero nakakita hinuon ko og post sa social media nga ang bana man ni Lolypop nga si Opao Barangay Captain Jojo Dizon ang modagan pagka mayor.

Si suspended Mayor Jonas Cortes mobalik man gihapon sa pagpapili sa katungdanan.