EDITORYAL — Nakulba’g kaldero pagsira sa POGO

Kaliboang mga trabahante sa Philippine Offshore Gaming Operation (POGO) ang nawad-an og trabaho tungod sa hingpit na nga pag-ban kanila ni Presidente Ferdinand Marcos Jr. tungod sa matud pa mga illegal nga mga kalihokan luyo sa operasyon niini.

Ning bag-o, gipahibalo sa Bureau of Immigration nga 55 porsiyento sa dul-an 10 mil ka mga langyaw nga mga nagtrabaho sa mga POGO hubs ang gipapauli na balik sa ilang mga nasud human nga gi-downgrade ang ilang mga working visa ngadto nalang sa tourist visas.

Apan dili lang mga langyaw ang nawagtangan og trabaho aning pagpasirado sa mga POGO hubs, kondili, apil pud ang mga Pilipinong legal nga nagtrabaho sa ilang mga pasilidad.

Dili man tuod sila direktang nagtrabaho sa online gaming aning mga POGO ang mga maintenance staff, security, ug uban pa, mga Pilipino man ang trabahante ug apil sila sa mga nawagtangan og trabaho tungod sa pag-ban.

Si PBBM sa iyang state of the nation address ning tuiga iyang gideklarar ang pag-ban sa POGO ug mimando sa mga hingtungdang ahensiya sa gobiyerno nga tabangan ang mga Pilipinong nagtrabaho aning mga maapektahang mga hubs.

Unsa kahay gihimo sa Department of Labor and Employment aning sitwasyon sa mga nakulban og panginabuhian sa pagsirado ug paghunong sa mga operasyon sa POGO?

Ang POGO kun tarungon lang gyud og dala ug walay nasagol nga binuang makahatag man gyud unta og trabaho sa mga Pilipino ug adunay buhis nga makolekta gikan niini.

Apan ang nakapait, ang mga nagpaluyo niini kwestyonable man kaayo ang pagkatao tungod kay aduna man sab diay silay mga criminal activities sa nagkalain-laing mga nasud diin sila kaniadto nag-operate.

Posible pa gani nga ang POGO gigamit kini para sa money laundering tungod kay aduna may pipila nga gironda sa kapolisan nga dunay nasakpang mga kinilong mga shabu ug duna say mga giimbestigar nga kaso bahin sa torture, human trafficking, extortion ug uban pa.

Ang kwartang gikita gikan aning mga ilegal ug kriminal nga mga kalihokan sa mga nagpadagan sa POGO, ilang gigamit sa mga legal nga negosyo aron nga legal nila kining madeposito sa mga bangko ug dili makwestyon.