Napugos ba ang anak sa pagsuporta sa ginikanan?

Dear Atty. Divine,

Ang akong uyuan nasakit ug anaa karon sa hospital. Ang iyang duha ka mga anak aduna nay ilang kaugalingong pamilya ug pulos kini nagtrabaho sa gobiyerno. Kay ako may nagpuyo duol sa akong uyuan, so ako ang mitabang kaniya ug midala sa hospital kay wala na man sab kini siyay asawa kay namatay na man kini 2 years ago.

Pagkakaron nagkaproblema mi sa iyang maintenance sa tambal kay ang iyang mga  anak miingon nga silay mobayad sa hospital apan wa na daw silay kwarta para ipamalit og tambal sa ilang amahan. Naluoy ko sa akong uyuan, unsa may angayan nako nga buhaton? Makapugos ba ang akong uyuan sa pagpangayo og financial support sa iyang mga anak alang sa iyang tambal? Daghang salamat.

Nida

Dear Nida,

Ang mga anak basi sa atong balaod, obligado sa pagsuporta sa ilang ginikanan, basi sa Article 195 sa atong Family Code (par. 3) nga nagkanayon nga ang mga ginikanan ug mga anak obligado sa pagsuporta sa usa’g usa. Basi sa balaod, kun duha o tulo ka mga anak ang obligado sa pagsuporta then dapat ilang bahinon ang gastuhan, depende sa ilang resources ug kun pilay panginahanglan sa ilang ginikanan matag buwan. Ang maayo nimong buhaton mao ang pagpahibawo sa iyang mga anak sa panginahanglan sa imong uyuan. Kun dili gihapon sila mohatag og suporta alang sa iyang maintenance sa tambal mamahimong moduol mo og abogado ug magpahimo mo og demand letter, kun di gihapon mosanong then mamahimong modangop sa korte ang imong uyuan aron ang korte na ang momando sa iyang mga anak sa paghatag og financial support sa ilang ginikanan.  Thank you and God Bless!

Atty. Divine

* * *

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.