EDITORYAL - Mao ray adlaw nakalugar

Gitakda sa Commission on Elections ang kataposang adlaw sa pagparehistro karong Septiyembre 30, 2024 para sa umaabot nga 2025 mid-term elections.

Gawas sa bag-ong magpa-rehistro, apil sa ilang dawaton kadtong mga mobalhin og pagparehistro ug kadtong magpa reactivate sa ilang rehistro.

Matud pa Comelec Chairman George Garcia wala nay extension o lugway nga ihatag para sa maong kalihokan.

Usa pa, sa buwan sa Oktobre pangandaman sab ang pagduso na unya og certificates of candidacies sa mga buot managan sa bugnong lugaynon.

Nabatasan ug nahimo na raba nga kinaiya sa mga Pilipino kanang sa deadline na makakita og oras para lihukon ang ilang mga kinahanglang buhaton sama aning pagparehistro.

Mao kini ang rason kun nganong magdasok-dasok ang mga tawo diha sa mga buhatan sa Comelec sa adlaw sa deadline kay dili naman tanan dayon maatiman tungod sa kadaghan.

Ang resulta, dunay uban mangasuko sa Comelec ug daghang magyawyaw diha sa social media ug mamahid sa ilang sayop ngadto sa uban.

Alang sa kasayuran sa tanan, ang Comelec adunay mga gibutang nga satellite registration sa mga piniling dapit sama sa mga malls diin pwedeng didto magparehistro o magpausab sa rehistrasyon ug uban pa.

Gituyo kini aron nga sa kataposang adlaw pagparehistro dili magdasok ang mga tawo sa ilang buhatan.

 Apan bisan pa man tuod adunay mga satellite registration venues, sigurado gyud gihapon nga magpunsisok unya ang mga tawo diha sa mga buhatan sa Comelec sa deadline, tungod mao gihapon ang rason, “mao ra adlaw nga nakalugar.”

Usa sab kini sa mga matan-aw unta sa mga magbabalaod, nga kanang mohatag og panahon sa mga nagtrabaho nga makaparehistro nianang tuig nga adunay gikatakdang eleksyon.

Kay usa sa mga rason sa mga tawo nga dili sila makaparehistro sa oras, kini tungod kay dili sila gustong mo-absent sa trabaho kay dili sila masweldohan anang adlawa. Kung hatagan pananglitan og “registration holiday” ang mga mamumuo, makatabang kini og dako sa Comelec. Kay kana gud dayoff, kasagaran mao nay adlaw ikauban ang pamilya o ba kaha paghimo sa mga ginbuhaton diha sa mga panimalay ug ubang importanteng mga lakaw.