EDITORYAL - Tag P50 mil?

Usa ka kanhi DepEd official ang matud mibutyag atubangan sa House good governance committee hearing nga nakadawat siya og sobre nga adunay tag P50 mil kada buwan sud sa siyam ka buwan samtang si Bise Presidente Sara Duterte-Carpio pa maoy kalihim sa DepEd.

Ang maong house inquiry may kalabotan kini gipasangil nga pagwaldas sa pundo sa publiko  ubos sa pamunoan ni Carpio samtang siya pa maoy kalihim niini.

Sa report sa Philstar.com, ang kanhi opisyal nga si  Former DepEd Undersecretary Gloria Jumamil Mercado  sa iyang gipanumpaang pamahayag , usa sa mga sinaligang opisyal sa bise presidente ang tigtunol sa maong sobre diha kaniya kada bulan sugod Pebrero 2023 hangtud Septiyembre 2023.

Ang sobre dunay nakasuwat nga “HoPE” nga ang gipasabot Head of Procuring Entity nga iyang gipangulohan. Gawas niini, si Mercado sab ang DepEd human resources head nianang tuig 2023.

Pagka-Oktubre nianang tuiga “boluntaryo” siyang mi-resign sa DepEd. Matud pa niya gipugos siya sa pagpa-resign, apan wala siya mosanong, apan boluntaryo siyang mi-resign.

Nagduda siya nga may kalambigitan kini sa DepEd Computerization Program ug gusto siyang impluwensiyahan aron mosugot bisan wala nasubay sa proseso.

Ang bise presidente nga wala motunga sa inquiry anang adlawa nagpatawag og iyang press conference ug didto misumbalik og pasangil kang Mercado nga nanimawos sa iyang pagkatangtang sa DepED.

Mipasangil sab ang bise presidente nga nag-solicit og P16 milyones gikan sa pribadong kompanya si Mercado ug mao kini ang hinungdan sa pagkabahin-bahin sa mga magtutudlo ug uban pang mga alegasyon.  Gihimakak sab niya ang pasangil bahin sa suway pag-impluwensiya sa DepEd Computerization Program.

Si Mercado pagkasayod sa mga gipamahayag ni Duterte batok kaniya, napugos sa pagpagawas sa pouch nga gisudlan sa mga sobre ug gipakita ngadto sa mga kongresista. Kinsa kaha nila ang namakak?

Kaning mga ingon niini nga mga panaglantugi ug pasangilay atol sa mga inquiries sa Kongreso, maayo gyud nga suportahan og mga ebidensiya ug magatubangay ang mga partidong nagpasangilay, maayong masayod ang katawhang Pilipino kay naglambigit kini sa kwarta sa katawhan.