Klaro na ang linya

Klaro na ang linya tali sa duha ka manag-alyadong grupo sa dakbayan--BARUG ni suspended mayor Michael Rama ug KUSUG ni acting Mayor Raymond Garcia.

Human sa buwag nga mga tigom nga ilang gipasiugdahan niadtong Lunes ug Martes, tataw na kinsay ilang mga kaalyado diha sa konseho.

Ang mga konsehal nga niadto naghipihipi, karon napugos paglugwa ug pagpili asa sila modapig.

Dunay pito ka mga incumbent nga konsehal nga miuban ni Garcia. Samtang si Rama duna say samang gidaghanon.

Silang konsehal ug acting Vice Mayor Dondon Hontiveros, Francis Esparis, Joy Pesquera, Franklyn Ong, Noel Wenceslao, Philip Zafra ug SK federation president Rhea Jakosalem nagpabilin sa grupo ni Rama.

Samtang sila si konsehal Jun Alcover, Rey Gealon, Joel Garganera, James Cuenco, Junjun Osmeña, Jaypee Labella ug Jerry Guardo tua sab makig-abin ni Garcia.

Ang nahabilin nga mga konsehal nagpabiling loyal sa Bando Osmeñ Pundok Kauswagan (BOPK) mao silang Nestor Archival, Mary Ann delos Santos, Joy Young ug Jose Abellanosa.

Sayod ko nga lain-lain ang rason sa mga konsehal sa ilang pagpili kinsay lider nga ilang sundon.

Ang uban tungod kay ni bilib sila sa abilidad ug prinsipyo sa ilang lider. Dunay mga nagtamod og utang kabubut-on ug kaikog. Duna poy uban nga nangluod hinungdan nga mibali og partido samtang ang uban tungod sa personal nga rason sama sa negosyo.

Busa angayang susihon sa mga botante unsay hinungdan nganong nagbalhin-balhin ilang mga konsehal og alyansa sa partido.

Sayod ko nga ang ubang konsehal mibiya ni Rama tungod kay gibalibaran sa ilang mga personal nga hangyo. Dunay uban nga nangluod ug wala na kasabot sa iyang liderato.

Ang uban mas nadani nga mokuyog ni Garcia tungod kay mas makapabor uban niya--apil na an personal nilang negosyo.