Abilidad sa pagpanag-an

Kumpiyansa si Presidente Marcos nga padayon nga mokunhod ang presyo sa bugas susama sa nahitabo sa mga kasilinganan’g mga nasud sama sa Thailand ug Vietnam tungod kuno sa gisagop niini nga polisiya pagpakunhod sa import tariff sa bugas.  Managlahi nga kultura, kinaiya ug level sa kurapsyon sa Pilipinas ug sa mga naasoy’ng mga nasud busa adunay posibilidad nga dili matinuod ang projection sa gobyerno.  Haum ni’ng kahimtanga ang panultihon nga, “Ang politiko adunay abilidad sa pagtag-an sa mga panghitabo sa umaabot ug labaw pa’ng may abilidad sa pagpasabot sa katawhan ngano nga wala mahitabo ang iyang panag-an.” Fezteleern!

Makakaon kon naay ayuda

Nanawagan ang mga food manufacturers ug mga bakers sa Department of Trade and Industry (DTI) nga ipatuman na ang dugay na nilang gihangyo nga pagpasaka sa presyo sa sardinas ug pan tungod sa padayon usab nga pagsaka sa presyo sa mga materyales nga gigamit paghimo sa ilang produkto.  Adunay dakong posibilidad nga uyonan sa DTI ang maong hangyo. Kon mahitabo, mosamot pagping-it sa kalisod ang mga Pinoy.  Haum ang panahom sa akong amigo nga, “Sa kamahal na unya sa sardinas ug pan, makakaon na lang kita niini kon adunay sunog og bagyo kay mao man kini naandan’g ipanghatag nga ayuda.”  Madahaan!

Kuyog apan dili kauban

Giangkon ni Bise Presidente Sara Duterte nga dili gayod sila managhigala ni Presidente Bongbong Marcos bisan kon iya kining running-mate niadtong 2022 elections.  Midugang si Sara nga ang iyang higala mao gayod si Senador Imee Marcos, ang igsoon sa presidente. Talagsaon ang kahimtang nga ang bise presidente ug presidente dili managhigala.  Ni’ng pag-angkon na Sara, nahimo silang perpekto’ng ehemplo sa pagya ni Cebu City Mayor Mike Rama nga, “Adunay Kauban apan dili Kuyog, ug adunay Kuyog apan dili usab Kauban.”  Atala lagee!

Angayan wagtangon

Namahayag ang COMELEC nga 41 na lang ka pundok sa party-list ang gihatagan nila og accreditation alang sa 2025 midterm elections.   Daghan ang naga-ingon nga ang party-list system angayan na’ng wagatangon kay ang mga representante la’ng niini ang nabulahan.  Makapahinumdum sa komedya bahin sa usa ka pari nga nagbahig sa koleksyon sa simbahan ngadto sa tulo ka bahin: ang usa, alang kuno sa pari, ang ikaduha, alang kuno sa mga kalag ug ang ikatulo, alang sa pamunoan sa simbahan.  Tungod kay siya man kuno ang pari, ug aduna usab siya’y kalag ug kay siya man ang namunoan sa simbahan, busa maadto gayod kaniya ang tulo ka bahin sa kolekta.  Pagkatoytoy!

Panagbuwag sa bunot ug bagol

Pormal na nga giputol ni Cebu City Mayor Michael Rama ang espekulasyon kabahin sa Rama-Garcia tandem ug iya usab nga gi-kumpirmar nga wala na ang maong panagkauban.  Mahinumduman nga si Acting Mayor Raymond Garcia maoy running mate ni Mayor Rama sa miaging 2022 elections ug gani gituohan nga siya maoy modawat sa renda sa pangagamhanan inig ka-pupos unya sa termino ni Mayor Rama.  Apan kalit nga nausab ang kamada sa dihang nasuspenso ang mayor.  Mao kana’y giingon sa pagya nga, “Magbuwag man gani ang bunot ug ang bagol sa lubi nga pilit kaayo, ang relasyon pa kaha sa mga politiko.”  Muleeeng!