Pilgrims site daku og tabang sa turismo — DOT

CEBU, Philippines — Department of Tourism kon DOT-7 nibutyag nga makatabang sa turismo ang mga pilgrim sites hinungdan nga gisuportahan nila ang katukuran sa 100-foot nga statue ni Sto. Padre Pio ug sa Our Lady of Divine Grace Church sa may Upper Tanay, Barangay Pulangbato Dakbayan sa Sugbo.

Gihimo ang Groundbreaking ceremony niini subay sa 22nd Feast Day of St. Padre Pio, niadtong Lunes nga gipanguluhan ni Auxiliary Bishop Midyphil Billones uban sa mga kaparian sa Archdiocese of Cebu nga gisaksihan sa mga bisita ug mga magtutuo nga deboto ni Santo Padre Pio.

Isip giila nga cradle of Christianity ang Cebu ilang gisuportahan ang pag promote nga sunod nga mahimong Faith ug Eco Tourism ang Padre Pio Contemplative Community of Cebu nga naa sa may sitio Upper Tanay, barangay Pulangbato, bukirang bahin sa dakbayan sa Sugbo.

Matud pa ni DOT-7 Judy Gabato, dako kaayo og kahigayonan nga malakip ang maong dapit isip pilgrimage site apan kay nagpadayon pa man ang trabaho ilang paaboton ang kahumanan niini.

Dugang ni Gabato, aduna man silay convergence sa DPWH-7 busa ilang ipaneguro nga maayo ang kadalanan aron luwas kini sa mga buot mobisita nga mga turista sa maong dapit.

Gitug-an ni Gabato, sila sa DOT-7 andam sa tanan higayon sa pagtabang sa maong pilgrimage site.

Si Knight Maximiano Fulache, President Saint Padre Pio Home for the Relief and Sufferings Philippine Foundation Inc, nibutyag mapasalamaton sila sa daghang mga grasya nga nadawat ug ang ilang gihimo ang pagpaambit pagbalik sa mga nadawat nila nga grasya ang katukuran sa simbahan ug statue ni padre Pio.  Dugang ni Fulache nga gilantawan nga makatabang usab sa komunidad diha sa bukid, diha sa ilang panginabuhian ug maayong dan, kon hingpit na mapatukod karong tuig 2027 ang maong simbahan ug statwa.

Ang Sanctuario ni Sto. Padre Pio ang abli alang sa mga deboto ug pilgrims, matag alas 6 sa buntag hangtud sa alas 6 sa gabii. (BANAT NEWS)