408 ka residente sa Brgy Binaliw nakapahimulos sa medical mission
CEBU, Philippines — Nikabat sa 408 ka residente sa barangay Binaliw, dakbayan sa Sugbo ang nakadawat og libreng medikal nga pag-atiman atol sa medical mission sa Prime Infrastructure Foundation Inc. (PIFI) ug Prime Integrated Waste Solutions Inc. (PWS).
Niadtong Biyernes, Septiyembre 20, 2024, gidala sa PIFI ang ilang programa nga “Healthy and Resilient Communities” nga nagsuporta sa mga komunidad sa Siyudad sa Sugbo. Ang PIFI usa ka corporate social arm sa Prime Infra nga adunay mga operasyon sa Cebu City.
Ang medical mission dunay tema nga “Tabang ug Pag-amuma: Alang sa Himsog nga Kaugmaon,” ug nakabenepisyo ang 408 ka indibidwal gikan sa nagkalain-laing mga sitio sa maong barangay nga ni-host sa Materials Recovery Facility (MRF) sa PWS Cebu.
Matud ni PIFI Executive Director Dave Jesus Devilles nga ang ilang medical mission uban sa mga programa sa edukasyon ug kalikupan, nagtabang sa pagpatukod sa mas maayong komunidad sa Cebu, nga nagsuporta sa mas maayong mga kinabuhi ug lig-on nga ekonomiya pinaagi sa mahinungdanon nga imprastruktura.
Ang programa giabagan sa lokal nga gobyerno sa Binaliw ug barangay health workers (BHW) nga gipangunahan ni Barangay Captain Viviane Ruste. Gisuportahan usab kini sa mga health practitioners gikan sa Southwestern University PHINMA, sa Health Service unit sa regional Philippine National Police (PNP), ug Cebu City Health Office.
Gidalit ang nagkadaiyang serbisyo sa medikal, dental, ug optical sa mga residente nga nahatagan usab og mga pagkaon. Gipahayag ni Barangay Captain Ruste ang iyang bug-os nga pasalamat sa foundation ug sa PWS Cebu, nga nagpunting nga ang ilang komunidad makabenepisyo gyud sa mga operasyon sa MRF.
Ang Medical Mission nahitabo usa ka adlaw human sa Adopt-a-School Activity Program sa PIFI, diin ang Foundation ug PWS Cebu nagdonar og P300,000 nga kantidad sa mga materyales pang-edukasyon, mga armchair, ug kagamitan sa mga prinsipal, school heads, ug mga child development workers sa Brgy. Binaliw.
- Latest
