EDITORYAL — Kawa sa politika

Nagsugod na ang pagbukal sa kawa sa politika dinhi sa Sugbu, partikula na sa Cebu City human hinayhinay nga nagiyahay na og pagpaila sa ilang mga kaugalingon ug partido ang mga lokal nga kandidato sa umaabot nga piniliay sa tuig 2025.

Karon pang sunod buwan pa, Oktubre ang pagduso sa certificates of candidacies sa mga gustong modagan karong eleksyon.

Kun mahitabo nga makaduso na sila og kandidatora dili na sila mahimong mangampanya nga wala pay campaign period kondili mahimo silang madiskwalipika.

Mao nga dili na angay ikahibulong kun makakita ang mga tawo og mga kandidatong manganha sa ilang mga lugar aron magpaila-ila.

Dinhi sa Cebu City, upat ka mga dagkong pangalan ang gipaabot nga magtigi sa posisyon sa pagkamayor, tulo nila adunay lig-ong partido sama sa Kugi, Uswag Sugbu (Kusug), Bando Osmeña Pundok Kauswagan (BOPK), Ang Team Rama o Barug party sa suspendidong mayor nga si Michael Rama, ug ang pundok ni kanhi PDEA-7 director Yogi Ruiz nga gihugon-hugonan sab nga modagan pagkamayor.

Mipahibalo ng daan si acting Cebu City Mayor Raymund Alvin Garcia sa iyang intensiyon nga mokandidato pagkamayor sa umaabot nga piniliay.

Ang orihinal niyang partido nga gimugna sa iyang amahan nga Kusug siya ug ang iyang lineup mopasilong.

Sama sa naandan, duna gyuy mga konsehal nga magtapon-tapon og partido. Kun sila maoy pangutan-on, nidapig sila og partido tungod nakita nila didto ang ilang kaugalingon kay parehas sila og baruganan ug direksyon nga sa ilang tan-aw mas ligdong makaserbisyo sa katawhan.

Hinuon, klaro man daan nga kining ilaha gyud para gyud sa “survival” kay gawas nga dako og gasto ang modagan nga independente, makatabang gyud og dako sa ilang tinguhang makadaog nga magpasakop og partidong lig-on.

Naa na sa mga tawo ang pagpili sa kun kinsa ilang botaran, apan mas maayo unta kun gamiton ang konsensiya sa ilang pagahimuon.