Kaligdong ug kabastos
Gitawag ni Bise Presidente Sara Duterte Carpio si kanhi Bise Presidente Leni Robredo nga peke nga VP. Kay nag-atubang og election protest nga gipasaka sa iyang gipilde nga si Ferdinand Marcos Jr. nga nipasangil og lapad nga tikas sa vice presidential election sa 2016. Pero dihang gitugotan sa Korte Suprema ang recount sa mga presinto nga gipili ni Marcos, nidako hinuon ang labaw ni Robredo. Maong gibasura sa tanang mahistrado ang kaso.
Wala bakwia ni Carpio ang pasangil. Pero gipadayon siya sa pinuy-anan ni Robredo sa Naga City, Camarines Sur.
* * *
Dihang mayor pa sa Davao City, si Carpio nipasangil ni Robredo nga nagpataka og komentaryo sa mga kaso sa Covid-19 sa pagsulbong sa pandemya. Napamatud-an ni Robredo nga bisan sa kagamay sa pundo sa Office of the Vice President (OVP) ang iyang mga programa epektibong nakatabang sa mga pasyente. Samtang napamatud-an nga ang pataka nga lockdown ug anomalusong mga transaksiyon sa pandemya ni kanhi Presidente Rodrigo Duterte nakapa-bangkarota sa ekonomiya.
Wala bakwia ni Carpio ang pagsaway. Pero gigahinan siya ni Robredo og usa ka oras sulod sa ilang pinuy-anan.
* * *
Gipasanginlan ni Carpio si Robredo nga wala motarung pagtubag sa pasangil ni kanhi Presidente Duterte nga duna siyay relasyon sa usa ka lalaking minyo. Gitulisok pa ni Carpio si Robredo nga naghilas-hilas sa pagpresentar sa iyang kaugalingon nga ligdong nga opisyal sa gobyerno. Wala kapamatud-i sa iyang amahan ang pakauwaw, samang nabisto nga pamakak ang iyang mga atake batok sa oposisyon.
Wala mangayo og pasaylo si Carpio. Pero wala balibari ni Robredo ang iyang pananghid nga ma-miyesta.
* * *
Daghang intriga ang nitumaw human sa panagtagbo nilang Robredo ug Robredo atol sa Peñafrancia festival, pero duha ka butang nga dili malalis:
Una, wala mausab ang baruganan ni Robredo batok sa extrajudicial killings ug pangurakot sa mga Duterte ug sa wa nila pagpanalipod sa West Philippine Sea (WPS) gikan sa pagpangilog sa China; ug
Ikaduha, wala mausab ang paglikay ni Carpio pagtubag sa lehitimong mga pangutana giunsa niya paggasto ang binilyon ka pesos nga pundo sa OVP ug Department of Education (DepEd) ug padayon nga pagtak-om sa panghasi sa China sa atong mga mangingisda ug kasundalohan sa WPS.
* * *
- Latest
