Nganong walay mapili nila
Daghang salamat sa bag-ong kaisog sa mga sakop sa House of Representatives ubos sa liderato ni House Speaker Martin Romualdez, nabisto ang mga anomaliya sa paggasto ni Bise Presidente Sara Duterte Carpio sa iyang budget sa niaging duha ka tuig:
Gipabalik sa Commission on Audit (COA) ang P337 milyones sa confidential funds sa Office of the Vice President (OVP) sa 2022 ug 2023 kay nakalapas sa mga lagda; ug
Gipabalik sa COA ang P12.3 bilyones sa gasto sa Department of Education (DepEd) sa 2023 nga nakaplagan nga pataka ug pag-usik-usik.
* * *
Imbes motarung pagpasabot giunsa paggasto ang buhis sa katawhan, si Carpio nisuway og lipat-lipat aron nga ang hisgutan mao nang iyang kaisog ug dili ang iyang kabanga:
Pagdumili pagtubag sa mga pangutana atol sa unang tigom sa House Appropriations Committee ug pag-boykot sa ikaduha nilang tigom;
Pagdumili sa pag-take og oath ug pagbiya human naka-diskurso sa tigom sa House Committee on Good Government nga nagsusi sa mga transaksiyon sa OVP; ug
Pakigkita ni kanhi Bise Presidente Leni Robredo atol sa Peñafrancia Festival sa Naga City, Camarines Sur.
* * *
Samtang angayng hangpon ang paningil sa pag-usik-usik ni Carpio, nga wala mahitabo dihang alyado pa silang Presidente Ferdinand Marcos Jr., angay sang tubagon ang mga sumbalik ni Carpio (bahala na kon hangtod karon wala siyay napakita nga ebidensiya):
Nga silang Romualdez ug House Appropriations Committee Chair Zaldy Co ra ang nagmaniobra sa tinuig nga budget sukwahi sa nauyonan sa House ug sa Senado; ug
Nga may mga kongresista nga nangayo og komisyon sa ilang gilista nga mga proyekto sa DepEd.
* * *
Samtang gipakpakan sa katawhan ang kaisog sa mga kongresista pagsukol sa kabastos ni Carpio ug sa mga Duterte, kadudahan ang ilang kaligdong kay:
Walay bisan usang nangutana sa makalilisang nga budget sa 2025 sa Office of the President (OP) nga P10.5 bilyones apil ang P4.5 bilyones nga confidential ug intelligence funds; ug
Samtang niinsistir sa transparency ug accountability pagtuki sa OVP budget, gipatigbabaw ang mas gamhanang tradisyon sa pagpiyong pagpasar sa budget sa presidente nga ig-agaw sa ilang speaker kay, nakatag-an ka, maoy mo-bendisyon sa ilang mga proyekto ug pork barrel.
* * *
- Latest
