Ang labaw sa tanan

Septiyembre 22, 2024: Ikakawhaag-lima nga Domingo sulod sa tuig

Mga Pagbasa: Kin. 2;12, 17-20/Sal. 54/San. 3;16-4;3/Mk. 9;30-37

Maayong Balita

Normal ra gyud sa bisan unsang kahugpongan nga dunay panaglalis sa mga butang o baruganan. Ning tungora ang mga tinun-an sa atong Ginoo naglalis kun kinsa kanila ang mamahimong labaw sa tanan. Ang atong Ginoo nipasabot nga si bisan kinsa nga buot mamahimong labaw sa tanan ang magpaulipon ug magpaubos alang sa tanan. Kay ang Anak sa Tawo wala moanhi aron magpaalagad kondili aron moalagad.

Kasinatian

Unsay imong nasaksihan ug nasinati sa mga tawo nga anaa sa gahom? Dili ba sila buot tagdon ingon nga mga VIP kun Very Important Person? Ning paagiha ang anaa sa ubos maningkamot gayud aron pagtuman niini. Sa atong pagka-binunyagan nadihogan kita nga mamahimong pari, hari, ug propeta  Ang atong pagkahari ato mang sabton diha sa konteksto sa pangalagad ug pagpaubos ug dili sa pagpataas ug pagpamugos.

Lihok

Karong semanaha alagari ang uban kutob sa imong mahimo ug segun sa tawag sa panahon ug panginahanglan. Dili ba nindot ang pamati kun sa uban ikaw nakatabang?

Pangamuyo

Ginoo, mapahitas-on kami tungod sa among naabot mao nga hatagi kami sa grasya sa pagpaubos maingon si Kristo Jesus among hari mapaubsanon. Pinaagi ni Kristo among Ginoo. Amen.